【古天后日誌】古天后日誌｜港股挑戰250日線 能否企穩為關鍵

6月15日，大致多雲，間中有驟雨及狂風雷暴，局部地區雨勢較大。美國聯儲局一如預期暫停加息，維維持聯邦基金利率於5%至5.25%區間，但最新利率點陣圖顯示，官員預測今年底利率中位數為5.6%，高於之前預測嘅5.1%高，反映半年仍有機會加息兩次，每次再加0.25%。如此一來，今年內減息嘅機會大減，其實美國經濟並未如年初預期或陷入衰退，基本上係無乜減息需要。而局方亦表明，按計劃繼續縮減資產負債表，減持手上國債及按揭抵押證券，即係現行嘅緊縮政策未有停止。不過聯儲局好多時都係得把口，明鷹暗鴿，一旦通脹持續回落，下半年一直唔加息，咁所謂嘅緊縮貨幣政策，自然有較大調整空間。美股隔晚美現較為反覆，道指跌232點，但標指跟納指分別升3點及53點，即使暫時美息仍有上調機會，但對息口敏感嘅科技股表現仍硬朗。雖然人民幣弱勢持續，內地經濟數據表現強差人意，內地5月信貸需求減弱，社融增量跟新增人民幣貸款都低過市場預期，顯示貸款需求仍受壓，經濟復甦力度不足。正正因為經濟狀況不似預期，市場一直憧憬內地將推出政策去刺激經濟，呢個亦係喺內地創業板指數持續走低之際，上證指數仍守住3200水平。不過內地要再減息，只會令人民幣走勢持續走弱，對內地股市不利，真係要睇阿爺出乜嘢招去救經濟，不過中國外交部昨晚宣布，美國國務卿布林肯將於本周日及下周一訪華，冰封嘅中美關係有望解凍，雙方重開溝通之門，中美關係唔再惡化，呢係係支持中港股市近日氣氛改善嘅原因。港股拾級而上，按隔晚夜期跟ADR走勢，今日如無意外將再一次挑戰250日線(19573)，若然250日線能企穩，下一步自然係50日線19680，暫時19700-19800嘅阻力唔細，要靠大成交配合先有能力突破，而目前港股最缺乏嘅，正正係無乜新資金流入，即使北水累計流入咗幾十億，但去到大阻力位之前，唔排除北水隨時食糊走人，一直未見有long fund 入場，19000樓上先嚟追貨，大市一掉頭，資金好易又被套死。

古天后

利益申報 :

筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。

免責聲明 : 

本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。

版權聲明:

本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。