港股企穩250日線展開反彈
3月1日，天晴， 日間溫暖及乾燥，早晚天氣清涼，日夜溫差較大。美股表現繼續反覆，先升後跌，三大指數報跌收市，標指反彈至4000水平掉頭，可見4000點成為短線阻力，而3900係短線支持。由於美國10年債息重返3.9%水平之上，相對標指盈利回報率不足5%，兩者只有不足1%差距，以美債為低風險投資，相比股票為高風險投資，呢1%嘅差距難以吸引大量資金湧入股市，不過當美股能保持長線盈利增長，以複利計算，股票長線回報當然跑贏美債。只係喺短線投資環境唔明朗下，資金選擇較保守嘅債券市場亦可理解。
今年美國經濟陷入衰退機會有限，橫向發展機會較大，回報率增長變相困難，不過美股仍有一定優勢，呢個係公司回購。睇返今年頭七個星期，標指及羅素3000嘅成份股，已經喺市場回購約2200億美元股份，創多年同期新高。高盛估計今年單係標普500指數企業，將回購金額將達1萬億美元，回購嘅力量令美股難以大跌。呢個係支持美股唔會出現大跌嘅重要原因之一。
至於目前困擾美股另一個原因係息口走勢，加息同加幾多仍然係市場焦點，法國及西班牙通脹超出預期，市場估計3月中歐央行議息時，將要加息0.5%，歐洲息率可能要到4%才會見頂。如此情況下，德國10年債息率先破頂升至2.7%，而美國10年息升上3.98%高位，債息上升引發美股隔晚午後急回。暫時美股仍然係由市場去揣測息率升跌去決定美股升跌，美股將維持反覆走勢一段時間。
至於港股整個2月都係調整，由高位22700回落至19700水平，回調幅度已足夠，3月上旬展開反彈亦合理，只係暫時仍未見有新增資金流入市場，就算港股反彈都係步步為營，暫時見步行步啦。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。