港股缺水問題未解決 下試250日線尋找支持機會大
4月24日，大致多雲，有一兩陣驟雨，早上部份時間天色明朗。美股上周五窄幅上落，三大指數微升，標指喺4200阻力較大，喺無特別利好消息之下，難以突破，暫時仍然係高位整固。美企陸續公布業績，出嚟結果大部份好過預期，主要係之前市場預計美國經濟衰退，早已預先調低美企盈利預測，結果美國經濟唔算太差，令大部份業績公布都略勝預期。
Tesla第一季毛利率跌幅較為嚇人，令股價失守165元支持，喺全球新能源汽車競爭加劇下，毛利率受壓係預期之。目前全球汽車一年銷量高達5800萬輛，Tesla預計今年銷量約200萬輛，僅佔整體銷量3.4%，呢個數目反映未來仍有頗大增長空間，雖然目前仍要打減價戰搶佔市場，但當電池成本進一步下跌，其毛利率自然會穩定落嚟，唔會再出現目前大幅收縮嘅慘況。
美企業績並唔算有乜嘢大問題，反而債務危機先至係市場黑天鵝，今年美國到期企債超過9000億美元，其中垃圾級別債務佔比超過兩成，而歐企亦有超過8000億美元到期，當中垃圾債級別債務敖過一成。喺利率仍高企下，呢批企債再融資成本增加，上月美國銀行爆出擠提危機後，銀行收緊貸款，一旦空軍又玩嘢攻擊美債CDS，隨時再爆鑊。
至於港股近日乏善可陳，成交愈玩愈縮，港股自3月結指結算至今，由21000水平回落至20000水平之間上落，上周五大市終失守多條移動平均線，目前僅餘250日線仍守住，但由於成交持續薄弱，港股易跌難升下，估計本周考驗250日線，即係19700-19800機會甚大。港股一日未能解決缺水問題，實難有作為，20000水平仍未見有資金肯入場，睇怕要再一次下試250線尋找支持，一旦250日線失守，好友最後防線係3月密集區嘅19400-19500點，此關一旦失守，代表由去年10月低位所展開嘅反彈浪告一段落，港股或進一步向下試18800水平，要睇屆時有冇資金肯入場接貨。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。