美國隔晚公布5月CPI，通脹比預期低，美股三大指數上升，標普500跟納指創13個月高位，港股連升五個交易日後，今早高開後有少少腳軟，加上今晚FOMC議息，缸邊友都抱觀望態度。暫時恒指喺19500 水平好淡爭持，呈拉鋸局面。
恒指高開26點，升幅一度擴大至119點，見19641半日高位，可惜唔見資金入場追貨，大市掉頭向下，倒跌60點，見19460半日低位，喺19500邊爭持。恒指半日報收19511，跌9點，暫未能修復250日線(19573)，呢個位阻力都唔細，要上破都有啲難度。國指升微升7點，報收6626；恒科指半日升49點，報收4101。半日成交額509.15億元，略見增加，重磅股升咗，股價高咗，成交額增加都係好自然嘅事。
藍籌股仍然係由科網股撐住個市，ATMJ仍然錄得升幅，不過半日只有騰訊(00700)升逾1%叫勁啲，美團(03690)、阿里(09988)跟京東(09618)升唔夠1%，有少少強弩之末嘅感覺。至於友邦(01299)跟大笨象(00005)半日分別跌0.6及0.1%，港交所(00388)日線圖出咗個黃金交叉，畀面都要升一下。不過內銀股就全線向下，阿爺要下調貸款利率同存款利率谷經濟，可惜有錢無人借，內銀貸存業務都係難撈，內銀股半日普遍下跌，跌幅由0.4%至近2%不等。內地電訊股今日全線向下，中移動(00941)跌1.1%算係跌得少；聯通(00762)跟中電信(00728)齊齊跌逾3%。餐飲股反彈，早幾日死死吓，今日總算止跌反彈，但亦未返仆落嚟之前嘅水平，以九毛九(09922)為例，唔上返14元樓上企穩，再向下尋底機會仍在。
港股半日挑戰250日線無功而回，有機會短線調整，首個支持位係19400點，呢個位係1月份低位，五窮月穿咗呢個前支持位就變阻力，6月份反彈升得穿呢個位，按道理係有機會扭轉弱勢，今日挑戰250日線不果，大佬打唔成仲要下穿呢個短線支持，大市就有機會反彈完成，再度逆轉向下。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。