【盤房來料】 好淡雙方於25000水平角力暫未分勝負(220726).docx

好淡雙方於25000水平角力暫未分勝負 半導體股繼續反彈帶動下，美股噚晚造好，道指高開77點後，升幅擴大至最多531點，收市升幅收窄至385點或0.74%，報52224；標指升65點或0.89%，報7509；納指顯著反彈329點或1.29%，報25837。重磅股中，SpaceX結束七連跌，股價收市反彈3.1%，同時帶動Tesla升2.5%；Nvidia回升2%，持有短炒貨唔郁住。INTC上得返105無走到，暫時喺條10MA附近，唯有睇住先。MU明明已升穿920，手痕喺938沽咗，跟住又935買返，今早見有個990盤後價，唔客氣減返半先，淨低一半睇住條50MA做防守，大約係940，有唔對路都要落車，仲留返一半係想睇下20MA上唔上得返，企返1000美元，或者又可以睇高啲，但暫時1000-1020係阻力區，下面支持880-900，留意呢啲位炒下上落。噚日見DELL上得返400，就喺403撈返一注，今早見盤後有425，嗱嗱聲減返半，咁淨低嘅一半，就用返個400-410做防守，再睇下係咪企到晒啲平均線，調整完成。至於META未搵返個上車位，短炒就唔搞住。噚日見資金明顯流返去啲high beta股份，久遺嘅NBIS，開市見企返190條5MA，又狗衝198，記得上次最後落車係268同249美元，200邊呢啲位，大大話話同我上次個食糊位都回咗兩三成咁滯，若然資金再炒返啲high beta股份，NBIS有機會嚟一轉，不過彈到220盤後見短炒有一成進帳，減返半220，餘下一半用200做防守睇住先。資金又重投high beta股懷抱，老登股包括納指七雄嘅MSFT同GOOG即時唔多識行，呢兩隻都仲有短炒貨，MSFT短炒買388，GOOG短炒買356嘅貨，暫時仍受制幾條移動平均線，暫守100MA，防守位仍然係340，今晚收盤後出業績，今晚再決定博業績，定係短炒貨喺業績前避一避先。NQ今晚分水嶺29200，支持29100/29000/28900/28800，阻力29300/29400/29500/29600。 目前市場嘅大戶，對於美股及AI股睇法有啲分歧，瑞銀交易部門認為，動力股拋售已接近尾聲，投資者重新就人工智能(AI)及晶片股建倉。該行對沖基金股票衍生工具銷售主管Michael Romano指出，AI基本因素改善係趁低買入訊號，建議採取逐步吸納策略。不過，摩根大通行政總裁Jamie Dimon於CNBC訪問中認為，投資者低估全球經濟面臨嘅風險，包括地緣政治及政府財政，最終可能引發市場震盪。佢表示以佢個人而言，唔會喺現水平買入股票或美國長年期國債。同時佢對AI發展前景同樣審慎，當前投資熱潮比作互聯網發展初期，擔心投入巨大資金未能預期般，如期獲得回報。最早發展互聯網嘅雅虎及Netscape均沒落，只有Google及Facebook最終成為贏家。而滙豐首席多元資產策略員Max Kettner於彭博電視訪問中認為，投資者應喺美企今季業績期過後降低美股持倉，警告持倉及市場情緒變化、財政刺激作用減退，以及美國國會中期選舉，均可能觸發市場回調5%至10%。有見及此，阿Man個短炒倉都仲係維持較高現金水平，而呢期短炒美股轉身要更快，因為市況變得更為波動。 至於港股噚日阿Man提到，反彈有機到咗尾聲，結果噚日恒指收市跌10點，報25132，成交額則縮水至2899億元，好淡雙方似乎喺24900-25200之間角力，暫時勝負未分。不過恒指已逼近較重要阻力區，現水平再追貨值博率不高，反映資金於現水平變得審慎，同時持貨者亦不急於落車，仍在觀察後市能否再向上突破。值得留意是昨日亞太區股市包括日、韓及台股大幅反彈，港股反而停滯不前，而港股之中嘅High Beta股，包括AI及晶片股等大幅反彈，相反老登股如騰訊(00700)及美團(03690)等不進則退，似乎資金又再進行pair trade，再次由老登股流向high beta股份。喺呢個情況下，隔晚夜期回落逾百點，ADR亦顯著回落，重返25000水平之下。今早黑期於24950水平附近徘徊，今早恒指低開153點，報24978點後，跌幅一度收窄至僅跌92點，高見25040但未能企穩25000。大市跌勢再擴大至最多295點，低見24836，其後跌勢回順。恒指半日收報24923，跌208點或0.83%。半日成交額只有1693.41億元，不過北水連續第二日淨流入。 近幾個交易日，即使恒指再挑戰高位亦未能做到價量齊升，成交動力正減弱，今日一旦再顯著跌穿20周線及5日線，分別為25050及24950，料再往下尋找支持。下一支持為24600-24700，即50日線24685附近，下方剛好接近10日線24621。如失守呢幾條平均線，則有機會進一步直指20日及30日線，目前已上移至23950及24054。至於上方仍受制100日線約25235，要扭轉自本年1月見28000水平高位後展開嘅下跌之勢，真係要企返上250日線即25700水平，否則暫時恒指仍然似一浪低一浪形態發展。