250日線靠穩有助3月上旬反彈
2月28日，天晴，天氣乾燥，早晚清涼。隔晚美股略為回升，但收市升幅已較盤中高位收窄，道指僅升72點；標指4000遇阻力，升12點；納指則升72點。噚日美股反彈，唔多唔少由Tesla反彈5%帶動氣氛，TSLA係目前美股最大成交股份，唔多唔少成為炒鬼指標，TSLA炒起係市場憧憬明晚Telsa發布會有關Master Plan3內容，估計發布會內將提及更多利用AI技術發展自動駕駛內容，以及Robotaxi及Tesla Bot開發進度等。
雖然唔少人認為美股喺3月份或迎來一個大跌浪，但暫時睇唔到美股有乜嘢跡象要大跌，預期美股暫時仍然係由息率走勢主導，除非3月意外地大幅加息超過0.5%，否則一切都係意料之內，又何來有大跌理由，反而古天后傾向相信美股表現繼續反彈，日升日跌嘅日子仲要玩一段時間。反而值得留意係連跌四個月嘅PCE反彈，呢個或者係通脹回升嘅警號，要睇油價及資源價格會否再升。
雖然PCE強勁不利暫緩加息，但同時亦反映美國零售業復甦進度理想，而美國零售銷售佔美國GDP高達七成，零售市道理想，美國經濟亦唔怕陷入衰退，呢個係支持美股唔會大插嘅理由。留意本周有唔少零售股公布Q4業績，屆時料可更清楚了解美國零售情況。去年零售企業因為庫存高企而停止購貨半年，亞洲區製造業因此陷入低潮，只要Q4業績能反映去庫存成績理想，零售商恢復採購，有助全球製造業走出谷底。
至於中港兩地股市噚日低位止跌，係唔係真正見咗短期底部回升，仍待觀眾。港股回落至20000水平之下，古天后已表現係一個重現值博率嘅買貨切入點，呢啲位買貨進可攻，退可守，問題係港股暫仍未見有新資金流入，成交方面偏靜，就算開始買貨，仍要耐心等待下一個升浪出現。250日線仍然係關鍵，期指2月結算後，今日到月結及場外結算，能夠守住250日線並重返20000水平企穩，3月上旬或能借兩會消息反彈。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。