【盤房來料】 恒指守250日線上試50及10日線(260526).docx

恒指守250日線上試50及10日線 上周五美股主要指數均見上升，當中道指破頂一度升544點，收市升幅收窄至294點或0.58%，仍創收市新高；而標指則升0.37%，收7473；納指升0.19%，收26343。不過當晚反映中概股嘅金龍指數急跌2.21%，因中證監嚴懲非法境外炒股，富途及老虎證券股價急挫逾兩成。不過周末期間，有外電報道指美伊談判獲得進展，不但霍爾木茲海峽全面開放，伊朗更同意交出鈾及不再持有核武，以獲取解凍伊朗被凍結金融資產，而雙方好有可能喺26日宣布達成協議。油價因此急回，紐約期油一度跌穿90美元水平，目前於90美元附近徘徊。美國周一假期，股指期貨於周一回升，納指期貨更一度逼近30000大關，不過至今早升勢回順。 上星期五美股焦點係中概嘅券商股富途FUTU及老虎TIGR，中國封殺非法跨境炒股通道，富途及老虎兩者合供被罰逾22億人民幣，兩股上周五ADR股價明顯波動，盤中一度跌逾三成，其後跌幅收窄，但仍跌超過兩成。其實早於2021年開始，內地已就有關非法跨境炒股進行調查，而行業整改亦非今時今日或針對個別公司嘅事；如今落實罰款及確定相關違規戶口，有兩年時間清倉，反而對內地券商係好事。而FUTU股價喺非常規交易時段，亦已重返90美元，較周五晚低位反彈逾兩成。至於阿Man手上嘅股份，假期前表現算係咁，其中MU喺700撈返嘅貨，今朝望望上到780，今晚睇下破唔破到前頂，有ALAB嘅慘痛經歷，MU決定守到740都持有位先，讓子彈再飛。CRWV繼續喺100美元上面行，INTC穩步上到120美元，同樣係等破頂。NBIS防守位略為推高至200美元。至於ONDS喺9.08元，暫時等佢上返10美元再睇。META上周五收市上返600美元樓上，598美元上車嘅貨，若然有650-660美元可能又食下糊先。 美伊談判進度理想，有望短期達成協議等公布，NQ喺噚日假期都有開期貨，盤中一度逼近30000大關，今早於亞洲時段就回吐至29800水平整固，睇下今晚夠唔夠力踩上30000大關。NQ今晚好淡分水嶺喺29800，支持29700/29600/29500，阻力暫時都係30000，呢啲大位未必可以咁易企得到，下方就睇29600會唔會由上周阻力變支持。 至於上周港股表垷反覆偏軟，由於習持會結束後，中美並未就呢次特朗普嘅國事訪問發表聯合聲明，反映兩國喺政治及經濟問題上仍存在唔少矛盾。上周一曾跌至25505逾半個月低位後，持續好淡爭持，於周四雖曾升至25833一周高位，但同日以大陰燭下跌至全周低位25386，周五雖反彈至25606水平，無奈再失守250日線，按周則跌356點或1.37%。夜期時段因富途等券商被中證監就遺規事件罰款，夜期更一度跌至25100水平，幸而其後反彈，但夜期仍較恒指周五收市低水逾百點。不過於周末期間，有外電報道，美伊談判已基本達成協議，內容包括開放霍爾木茲海峽，惟仍待美伊雙方及相關中東國家最終敲定。油價急跌，紐約期油一度跌穿90美元水平，而昨日全球股市普遍上升，今早港股反彈，但表現仍反覆。恒指高開16點後，淡友仍然死心不息，加上A股噚日急升後，今日回吐，淡友乘勢一度將恒指質低174點，低見25431。不過好友反攻，恒指重拾升勢，半日恒指報收25742，不僅企穩250日線，更逼近50日線，半日成交額2003億元。 港股後市能否保持反彈，進一步挑戰幾條移動平均線，取決於250日線即25600-25650水平能否企穩，目前大部份技術指標，包括中短期市均已全面轉差，技術上不利後市發展。今日能否借美伊談判有進展而扭轉弱勢，美伊局勢發展仍為關鍵。反彈首個阻力為25800-25900水平，下一阻力為26000/26100，至於250日線約25600仍為好淡走勢關鍵，再度失守此支持，港股仍有機會往下尋底。