【盤房來料】 港股跌勢未止 暫險守二萬三(250626).docx

港股跌勢未止 暫險守二萬三 雖然美伊談判未見有再有突破性進展，但隨住更多運油輪駛過霍爾木茲海峽，紐約期油自3月初以來首次跌穿每桶70美元，加上美國債息向下，美股道指周三早段上升，但標指跟納指則先升後跌，市場等待MU收市後公布業績。美市收市，道指收市仍升182點或0.35%，報51848；標指跌7點或0.1%，報7358；納指跌110點或0.43%，報25476。 GOOGL將於下周正式加入道指成份股，但消息未有帶動GOOG股價向上，目前叫做到條100MA即336左右守得住，但除咗呢條平均線同250日線之外，GOOG至少要企返條10日線同20日線先可以穩定啲，想再入場都要再觀察一下。至於MU中返1050個買盤之後，本來係用1030做止蝕，但開市期間，阿Man嘅戰友提醒咗一句，條20MA喺1010左右，佢話自己1028買咗少少博業績，會用990做止蝕等公布。阿Man參考咗佢意見，決定原來個取消咗嘅1000買盤掛返上去，再用985做止蝕去覺瞓。瞓醒真係有驚喜，業績公布個毛利率顯示存儲芯片定價權仍然喺極強狀態，MU預計第四財季嘅毛利率將會去到86%，市場又再興奮過，股價盤後又破頂。瞓醒見有1200又忍唔住1205減咗半，減咗半股價繼續向上，至中午其股價已升至1240水平再創新高。其實遇到破頂股真係咪估頂，順勢推高止賺，暫時止賺位推到去1170左右，剛好係日線保力加通道頂部，返入通道內就有機會要做整固，咁食埋啲短炒貨先都無壞。DELL強勢持續，半注持有無郁過。NBIS同MRVL分別喺278同埋275止賺咗，見MU有咁好業績，忍唔住又喺272大約NBIS條20MA狗衝返半注當係208仲有半注游咗一下水，不過差價只有6元，其實係做得差少少，本來278止賺完，係248擺返個買盤，差少少買唔返，唯有死死地氣，272照補返半注，不過今晚唔企穩條5MA大約係277，都要小心，可能又要落250元接近20MA加注，240個防守位唔可以穿。MRVL同樣係今朝盤後時段見20MA仲頂到，又喺270撈返半注先，望返噚日個低位做防守。暫時短炒倉仲有MU、NBIS、MRVL、DELL、INTC、CRML、KLAR，總之短炒都係且戰且走，嚴守止蝕，同埋只炒強勢股，弱勢股放埋一邊先，優質股就算係GOOG，佢未穩定轉返勢，暫時都係觀察住先。 美銀將MRVL目標價，由240美元上調至365美元； INTC目標價，由135美元上調至160美元。摩根大通相信美股正朝向「藍天」(Blue Sky)情景，主要因為盈利較預期強勁，以及美國與伊朗達成潛在和平協議，因此將標指今年底目標從7600點，調升至7800點，即較周二收市有近6%上升空間。暫時市場情緒仍然係樂觀。不過老實講，大部份當炒美股估值已唔平，高追任何股份，都要計好條數，都要有個止蝕位，仲要分散投資，阿Man從來唔信一注獨贏，呢啲運氣嘅嘢，贏一次之後，可以輸N次，都係守紀律，保住本金為上策。 美國10年期債息一度滑落9.2個基點，報4.396厘，對息口較敏感的2年期債息降6.3個基點至4.137厘。美滙指數曾揚0.39%，報101.8，彭博美元現貨指數升0.38%，創7個月新高；日圓跌0.17%，低見161.85兌每美元。加密貨幣「一哥」比特幣一度挫6.4%，報59029美元，失守6萬美元。美元強勢，現貨金價最多下滑3.7%，跌至3959.02美元。麥格理最新預測金價今年第三季見4450美元，較原先估算低3.3%，第四季估計為4300美元，亦較之前預算低2.3%，理由係中東衝突結束，削弱黃金的避險需求，同時面對加息前景及美元轉強。 港股終止五連跌，恒指高開84點後，大部份時間喺23400水平徘徊，午後最多升229點，見23565，收市升幅收窄至75點，報23412。至夜期時段，市場等待美光盤後公布業績，夜期及ADR偏軟，回落至23300水不。不過美光業績公布後，股價急升，帶動納指期貨回升，日韓股市做好，黑期亦隨之重上23400水平，以為今早港股可以借勢反彈。誰知反而低開23點，報23388，已經係半場高位，連條100周線大約係23400連影都無，失守呢條線，淡友隨即發動攻勢，大市跌幅最多擴大至407點，低見23004。下半場更一度跌穿23000，暫時反彈乏力。若然今日下半場都無反彈，並收低於23213噚日個低位之下，將進一步考驗由2024年低位14794升至今年1月高位28056回調黃金比回調0.382即22989，咁都唔反彈，下方較重要支持係250月線22400-22500。至於反彈返面，首個阻力喺23435條100周線，基本23250要先企穩先有條件上返23400。企穩23400有支持，則有望反彈多少少，上方阻力重重，過到條為5日線已急速下移至23500，10日線下移至24000，阻力極大，因為咁嘅情況下都唔反彈，條下降軌就會落到24000，一日唔突破返條下降軌，港股都仲未脫離危險期。至於仲有冇本事彈高啲，就真係要睇啲均線排列有冇改善，以目前走勢睇，港股仍然係只有波幅，無升幅，處於一浪低一浪嘅下跌走勢浪中。