【盤房來料】 期指結算前轉倉高峰期大市窄幅上落(250826) (1).docx

期指結算前轉倉高峰期大市窄幅上落 美國財長貝桑宣布要徹底孤立伊朗，仲表示邊個撐伊朗都一併要對付，不過相關制裁並未有具體細節，加上市場對美伊戰爭消息早已麻木，除非再掟出震撼彈，否則對市場氣氛影響有限。投資者焦點繼續放喺晶片股、財政及貨幣政策之上。美股周一晶片股受壓。與此同時，美國加碼回購國債行動繼續令美元貶值交易熱炒，現貨金價重越4600美元。彭博追蹤嘅黃金交易所買賣基金(ETF)上周增持超過28噸黃金，為自1月以嚟最多。 至於美股三大指數個別發展，道指收市升140點或0.26%，報收53417；標指則跌21點或0.28%，報7652；而納指跌200點或0.76%，報25980。費城半導體指數跌2.7%，唔少晶片股都插水，阿Man愛股MU亦唔例外，本來打算900-920搵位上車，但噚晚都係縮咗沙，結果落到890邊，可惜無上車，夜盤時段上返920，似乎880-980呢個炒上落嘅range暫時有效，唯有今晚再睇睇。至於DELL都係咁款，唔上唔落，死又死唔去，但又企唔穩嗰幾條平均線，暫時就喺幾條平均線之間穿梭。MRVL減咗半，都叫做坐得幾穩，207嘅買盤改咗去210，但一樣無影，手上嘅貨繼續持有。NBIS同ALAB暫時未穩，暫列入觀察類別。NVDA短炒嘅貨，210中咗個止賺盤落車，明晚收市後公布業績，股價連跌七個交易日，反正有長線持有嘅免本貨喺底，業績前就唔手多多。CRWV似乎又回到近兩星期個Range，86先買入半注，82仲有個買盤，79-80做防守，博佢彈返上90樓上。NQ噚晚都算易炒，穿咗29200個分水嶺，輕輕鬆鬆落200點，暫時29000似乎又頂得住，但老實講，上唔返29500樓上企穩，都係算弱少少。今晚分水嶺29200，支持喺29000/28900/28800，阻力29300/29400/29500。 美國10年期債息回落3.4個基點，至4.704厘，30年期債息下跌4.3個基點，至5.232厘。明尼阿波利斯聯儲銀行總裁Neel Kashkari於哥倫比亞廣播公司(CBS)節目中淡化美國債息攀升擔憂，稱市場運作良好，息升唔太可能影響當局評估貨幣政策，但就拒絕為9月會議上會否繼續主張加息表態。市場靜待本周美國公布通脹數據，希望從中可以找到之後利率路徑嘅一啲端倪。美滙指數回升0.2至99，日圓降0.13%，至159.15兌每美元。 港股昨日顯著下跌，恒生指數低開229點後，一度跌578點，見25430低位，全日跌492點或1.89%，報收25517，不僅結束5日升勢，更一口氣跌破5日、10日、20日及250日移動平均線，走勢再度轉弱。當中因阿里巴巴(09988)配股拖累，科指更跌172點或3.61%。成交額增至2911億元，當中北水終於結束三個交易日淨流出，反而錄得逾百億淨流入。雖然阿里巴巴配股集資，獲機構投資者垂青，市場反應熱列下，集資額增至800億元仍錄得超額認購3倍，但此舉卻惹來市場憂慮重磅股抽水潮開始，影響市場氣氛，拖累本來高位已上升乏力嘅科技股被拋售。不過夜期噚晚反彈，上返25550之上，今早恒指高開116點，報25634，以為咁神勇一嘢重越10日線(25507)，最多升過159點，高見25676，可惜20日線(25658)僅曇花一現，並掉頭倒跌，一度倒跌113點，低見25403，接近噚日嘅低位又守位。其後呈窄幅上落，似係因為期指轉倉高峰期，指數變動唔大，半日跌64點或0.25%，報25453。大市半日成交1267.55億元，算係偏靜，但北水錄得淨流入一日，今早半日又回復淨流出30.51億。 目前恒指再度失守20日線及250日線，如一直未能收復20日線，料短線再考驗100日線即25200水平，及日保力加底部約25150水平，一旦失守則往25000及24800尋找支持。而50日線24755成短線阻力，由於周五為期指結算日，預料本周因期指踏入轉倉高峰期，指數料於25600即保力加中軸三兩百點內上落，暫未向上或向下突破，或於結算後，下周方有較明確方向。如結算過後心恒指仍未能重返20日線並盡快收復250日線，結算過後有機會向下突破。