港股後向好壞還看25600-25700關鍵位置
日本央行今日議息，但日本政府已先偷步進行今年第二輪干預滙市行動，日圓喺美國周四早段突然攀升3.35%至157.95兌每美元。美元兌大部分主要貨幣急回，美滙指數一度回落1.02%，報99.86。美匯指數回落，反而有助美股反彈。道指周三顯著下跌1153點後，隨着市場對聯儲局加息擔憂有所紓緩，周四裂口高開520點，其後曾輾轉擴大升幅至672點，高見52266；美市收市，道指仍升613點或1.19%，報52208；標指升121點或1.66%，報7437點；納指勁彈679點或2.78%，報25122；納指100更厲害，升3.36%，報28106；費城半導體指數終於識得彈，喺啲內存股翻生之下，報復式反彈8.19%，報11302。
微軟業績理想，股價收市抽高15.5%，為表現最強道指成份股，市值單日增加4500億美元，創股市之最，阿Man持有388嘅短炒貨，沽咗一半450，鎖定一半盈利，另一半用返個420做防守，睇餸食飯。反觀Meta收入預測遜色，加上上季現金流急降引發憂慮，股價急跌8%，連跌11個交易日，半個月市值蒸發兩成；之前阿Man穿600，狠心斬595係正確做法，嚴格執行止蝕，係保本保盈利第一要遵守嘅紀律。蘋果公司周四收市後公布業績，股價回吐1.4%，同樣派成績表嘅亞馬遜則抽高3.9%，兩隻貨都係阿Man倉底嘅基座股，前者投入多年，早已負成本，後者成本大約係180，長線投資就唔會點郁，坐貨等收息。Nvidia及Tesla分別升2.7%和3.5%，NVDA仲有短炒倉，唔穿185係繼續持有，不過都要望住個200-205係咪有阻力，上唔返去，短炒食咗先無壞。內存股回勇，晶片股回穩，美光科技(Micron)及英特爾分別大升18.3%及11.4%，SK海力士及台積電ADR分別炒高17.5%及7.6%。一直係阿Man愛股之一嘅MU，今次反彈阿Man反而無參與，因為噚日見內存股同AI股午後即美股夜盤開始彈，計下數似乎衝返去一直喺watch list嘅NBIS好似更加快手，話晒細細粒容易食，盤前158衝入場，以股數計，同一筆錢可以買到四至五倍份量嘅MU，即晚見有194落車，皆因怕條20MA即係197左右有阻力，為免夜長夢多，都係食先無壞。瞓醒見到大部份內存股同AI股仲有得彈，不過阿Man都食咗一轉，集中火力炒住個NQ好似仲快手。噚日個NQ相當精彩，報復式反彈至28400水平，打爆返個28000，挾埋上條10MA。阿Man穩陣起見，未有盤前偷步，等到開市企到個分水嶺27400先衝入去做好倉，殺到上27800前，本以為會頂死，落車後見27850都企穩，再衝多次好倉，但去到28150前就止賺咗落車，然後又沒有然後。嚟到美國夜盤時段，喺亞洲市場中午個NQ已上到28500水平，呢下係V彈係見底完成調整，抑或純粹死貓彈，暫時圖表話我知係後者，除非可以上得返條20MA，企穩29000，否則暫時視為跌浪中嘅反彈。今晚NQ分水嶺28400，支持28300/28200/28100/28000，阻力28500/28600/28700/28800。
至於港股喺昨日期指結算日變動不大，恒指高開67點，雖然早段一度逼近二萬六關，但其後升勢回順，最終收市升50點，報收25858，連升第四個交易日，成交額3048億，尚算合格。今早恒指低開21點，報25837，當期指開市裂口高見26100水平之際，現貨竟然低開二萬六無影，淡友隨即發難，大市一度跌穿俗稱牛熊線250日線(25723)，最多跌235點，低見25622點後喘定，又守返25600大型頭肩頂條頸線上面，其後大市一度倒升58點，高見25917，但一如阿Man噚日已預測，二萬六關前要抖抖。恒指半日收報25830，跌28點或0.11%。
雖然半日大市仍守25600至25700呢個即市支持同短線關鍵位，但市寛繼續背馳，而短線RSI 2則持續第三個交易日處於90水平之上，意味短線回調壓力大增。不過恒指已連續兩個交易日企穩250日線之上收市，加上20日線已升穿50日線，發出第二個黃金交叉利好訊號。即使26000水平前有短線回調壓力，但只要250日線即25700水平，及25600大型頭肩頂頸線位置守穩，港股回踩支持後，仍有機會突破26000水平，如成功企穩，即突破由1月高位28056延伸至今嘅下降軌頂部，及保持於由上月低位延伸之上升軌底部之上，則港股不僅於五窮六絕後七翻身，更有望展開另新升浪。不過，港股持續反彈回升至25000水平之上後，成交一直未能配合價量齊升，一旦已調整近月之AI及內存股完成調整，見底回升料會再度吸引資金回流，或又出現資金流出老登股情況，有礙港股再向上突破。目前港股正處於一個重要好淡臨界點，續後係新升浪展開，抑或反彈結束再繼續調整浪，25600-25700為一個關鍵位置。
Administrator
2026年7月31日