【盤房來料】 期指結算前大市乏明顯方向(260126).docx

期指結算前大市乏明顯方向 美股連續兩日反彈後，上周五個別發展，道指曾跌420點至48963，收市跌幅收窄至285點或0.58%報49098；標指微升2點或0.03%，報6915；納指反彈65點或0.28%，收23501。重磅股方面，Nvidia升1.5%，微軟反彈3.3%，亞馬遜升2.1%；英特爾喺晶片生產遇挑戰並拖累業績，股價急跌17%。高盛跌3.8%，摩通回落2%。自發生格陵蘭事件後，美債持續下跌，有消息指歐洲多國持續減持美債，美債價回落令債息高企。而特朗普喺外交事務上變幻莫測，歐美關係愈趨緊張，正影響歐洲評級機構Scope對大西洋兩岸主權國家評級展望，而特朗普嘅施政措施難以捉摸，加上佢不時出言威逼聯儲局減息，令市場質疑美聯儲局獨立性，正持續影響着美國信用前景。值得留意美債持續疲弱，或引發美股轉弱，金屬價格不斷破頂，正正反映資金避險情緒仍高漲。 不過美股仍有個別股份，可以趁低吸納，今日阿Man打算盤前吼住隻INTC英持爾，上周五公布業績急跌，其實呢份業績都預咗麻麻，因為呢份業績係未反映佢成為國家隊份子嘅業績嚟，不過周五股價收市跌近17%，盤後再跌2.7%，大大話話跌近兩成，又似乎跌過籠。話晒侵侵都強調要美國製造，其實係唔使擔心英特爾會無生意，反而要擔心係佢未能加快擴大生產線以趕及訂單需求。暫時吼42-45美元買入，以40元做個防守位，博佢返想50美元應該問題唔大，中線阿Man係睇佢今年可以再升穿之前54美元高位。NQ方面，今日個好淡分水嶺大約係25600，下方支持仍然係25450-25500，再下一個支持位係25250-25300；至於上方首個阻力25750-25800；較大阻力都仲係25950-26000。 至於港股上周表現反覆，美國總統特朗普有意謀奪格陵蘭，並就反對此事歐洲八國額外加徵關稅，曾令港股上周初開局連跌兩日，但其後特朗普又再TACO，美股大幅反彈，港股連彈三個交易日，但以一周累計，恒指仍跌95點，上周五報收26749。雖然周末美國發生民眾於示威中被槍殺事件，民主黨表示或撤回預算案支持，或令華底於月底再度陷入停擺，令道指期貨今早走軟，不過今早黑期未見有太大反應，仍於26700水平徘徊。雖然恒指上周初一度大幅跌穿5日及10日線，但其後反彈並收復，短線技術走勢未致被完全破壞。不過本月港股成交明顯減少，反映資金於市覆市況下採觀望態度。不過北水持續流入港股，令港股市底偏強。值得留意為金屬價格持續破頂，今早金價已破5000美元，反映資金避險情緒仍高漲，預計短線股市表現仍反覆。暫時恒指短線於26300水平有一定支持，但要企穩27000關並不容易。 本周四為期指結算日，今日起開始踏入期指轉倉期，今早恒生指數高開94點，其後倒跌129點，曾低見26619，不過去到25600水平有反彈，加上早段A股上證曾升近20點，帶動港股回升161點，一度高見26911，可惜未能一口氣再挑戰27000，半日升幅收窄至26點或0.09%，報26775，暫時喺條20日線附近上落。半日成交額1510億元。雖然港股市底尚算強，但近日成交縮減，令上升動力減弱，估計喺周四期指結算前，港股或於26300至27000之間上落，直至結算過後先有再更明確方向。個股方面，留意下德昌電機(00179)，上星期機械人股落鑊炒，德昌電機跟唔上，周五更跟穿埋幾條移動平均線，今早再跌3%，技術走勢嚟講就唔多好靚。但以基本因素嚟講，呢啲位其實有一定值博率，25元有一定防守性，用24.8元條50周線做防守，博佢三兩日上返30元樓上，中線目標睇返35至40元。