【盤房來料】 港股高開低走 十日及廿日線得而復失(260226).docx

港股高開低走 十日及廿日線得而復失 Nvidia昨晚於收市後公布業績，此前美股繼續做好，道指高開183點後，升幅一度擴大至342點，收市道指仍升307點或0.63%，報49482；標指升56點或0.81%，報6946；納指反彈288點或1.26%，報23152。雖然反映中國概念股表現的金龍指數回吐0.47%，報7545，但夜期及ADR隨美股做好，恒指回升至26900水平。Nvidia收市後公布截至1月底止第四季業績，收入預期大增68%至659億美元，每股經調整純利料升72%，至1.53美元；盤後股價一度急升至203美元水平，可惜200美元未能企穩，股價回落至195美元水平，跟業績公布前相約。Kepler Cheuvreux跨資產策略主管Arnaud Girod指出，基於客戶龐大資本開支，Nvidia業績預期表現理想，但最重要係市場反應，又提到納指要靠其股價上升扭轉現時跑輸大市局面。不過暫時MAG 7股價表現平平，僅於區間上落，仍未見突破。CRWV果然掂一掂100美元，就落返98樓下，暫時可能整固一下，短線95美元守到，後市仲有得上。SOFI企到19美元，防守位可以擺高少少去17美元，目標維持20至22美元。至於ALAB又真係落到122-124美元見支持，順利搵到個位上車，盤中上返128美元，盤後喺127-128美元徘徊，既然有靚價上車，以122美元防守，等佢上去130美元樓上。之前叫吼位嘅ONDS都幾對辦，8.5-9元附守，公司股份過晒解禁期，消化晒啲沽盤後，股價要上返12美元難度唔大，而中線目標係14至16美元，依家股價喺10美元左右，坐住10美元附近買嘅貨，都算坐得幾舒服嘅。噚日美股續彈，以納指表現最勁強，NQ尾市一度抽穿25400水平，見返條100日線，可惜到亞洲期貨時段，條100日線得而復失，又去返25300水平窄幅上落。今晚NQ分水嶺25300，支持25200/25100，25000會有較大支持；首個阻力25400/25500，25600阻力更大。 至於港股噚日反彈，恒生指數高開154點後，最多升279點見26870高位，收市升175點或0.66%，報26765，全日成交額2367億元，以北水回歸後嚟講，成交唔算太活躍。昨日財政司司長發表新一年度財政預算案，內容無太大驚喜，不過大笨象(00005)公布季度業績勝預期。至夜期時段，港股跟隨美股上升，夜期及ADR升至26900水平，較昨日收市高水逾百點。今早黑期喺26900徘徊，港股喺期指結算日，高開低走，恒生指數高開254點，最高見27024後掉頭向下，27000水平目前約為20日線所在，20日線曇花一現即再失，半日一度跌201點，低見26563，叫做喺條50日線前就見支持，但反彈力麻麻，半日仍要跌109點或0.4%，報收26656；國企指數跌117點或1.3%，報8917；恒科指跌89點或1.69%，報5171。繼昨日北水錄得淨流出後，半日北水繼續淨流出44.89億元。 今日大市無啦啦整個裂口高開即掉頭，淡友形容係開倉派米，20日線企唔穩就做淡倉，以3月期指計，高位足足回500點多，話係派米都唔誇張。中午港交所(00388)公布截至去年底止全年業績，股東應佔溢利177.54億元，按年升36.05%，連續第二年創新高，每股基本盈利14.05元。從近日港交所股價表現睇，一啲都感受唔到港交所業績咁威猛，下半場睇下股價有冇反彈，暫時條20日線約418.83成為反彈阻力。如港交所有反彈，或者可以助力大市彈返少少，但科技股積弱，大市彈上去企唔返26800，整體嚟講真係麻麻。暫時大市仍然處於區間上落，下方以26200-26300為短線支持，失守或再向下尋找支持，留意26300係日線圖嘅頸線位置，一旦失守，整個頭肩頂形態形成，跌穿頸線嘅話，或會出現一個更大幅度調整，呢啲調整講緊係以千點計，若然外圍股價有乜冬瓜豆腐，恒指失守呢個位26200-26300，下面再落多次見25000亦唔係無可能。至於上方阻力仍然為27100-27200，而27300-27400阻力更大，除非大市能企穩於27400水平之上，方有條件再挑戰高位。至於外圍股市表現仍然強勁，不過中東地緣政治局勢仍緊張，投資者宜密切留意事態發展，一旦戰事爆發，或對環球股市造成震盪。