【盤房來料】 恒指於幾條移動平均線穿梭悶局未見突破(260826).docx

恒指於幾條移動平均線穿梭悶局未見突破 美伊雙方計劃恢復談判，雙方料暫不再爆發全面衝突，國際油價及美國債息從高位回落，美股周二向好，道指高開177點後，升幅擴大至最多258點，高見53675，收市道指上升160點或0.3%，報53577；標指回升24點或0.32%，報7677；納指升171點或0.66%，報26151。美元貶值交易有退潮跡象，加密貨幣「一哥」比特幣曾升2.95%至81257美元，為5月中以來高位，隨後掉頭靠穩，於一個月內已回升逾兩成。現貨金價升0.98%至接近4700美元3個月高位後，一度倒跌1.01%至4605.37美元，其後回穩守位4600美元大關。 個股表現中，Nvidia將於周三收市後公布業績，股價回升2.2%，扭轉7天跌勢。阿Man個210止賺盤中咗，因為今晚收市後業績，就唔打算博短炒，當然倉底嘅免本貨長線持有，等埋業績再睇要唔要入場再博殺。NBIS又上返220樓上，可惜個止盤中咗210係孤寒咗啲，防守用200就唔會白白犧牲咗，不過睇返日線圖，NBIS個股價行咗個下跌神奇九轉出嚟，噚日行到第六轉，反向彈咗一彈，再等佢個神奇九轉繼續發展落去，去到第九轉係咪真正見底先買返。MU果然係880個Range底有強大支持，三兩下又彈返上去930上，留意10MA喺950，50MA喺962，呢兩個位睇下會唔會變成阻力，咁短線區間或者會收窄到900-960；暫時手上已出清MU，但就擺咗個買盤喺900，都係用返880做防守。DELL又反而幾穩陣，企返條20MA，再等下條10MA即462能否收復。MRVL成功收復全部移動平均線，淨低一半嘅短炒貨，防守位可以上移至230元，下面買盤210已取消，目標先睇早兩日高位252先。CRWV仲係等佢上返90，82買盤繼續擺，78-80防守仍然要睇到實。NQ仲係幾百點上落，29200呢個分水嶺再玩多日，支持位29000/28900/28800，阻力位29300/29400/29500保持不變。 Nuveen環球投資策略員Laura Cooper稱，投資者仍等待重要事件，以評估9月市場走向，包括聯儲局9月議息結果，以及人工智能(AI)企業盈利表現，能否重振對科技股樂觀情緒。美滙指數反覆曾跌0.14%，報98.86，日圓最多跌0.24%，報159.49兌每美元。高盛將日本央行下次加息時間，由原本明年1月提早到今年9月，之後預計於明年1月及7月進一步上調利率。該行經濟師指出，隨着日圓回落至接近160至164近期干預滙市區間，令市場對加息預期升溫，倘當局按兵不動隨時觸發日圓進一步貶值和加劇通脹。掉期市場顯示，日本央行9月加息機會約81%。 港股昨日窄幅上落，恒指高開116點，一度升159點見25676位，但20日線(25661)未能企穩，掉頭回落跌113點見25403低位，午後收復失地，最終僅跌6點，報收25511，剛好重上10日線(25510)，成交額2540億元。雖然港股於周一顯著下跌後，勢頭轉弱，再度失守20日線及250日線(25758)，目前26000阻力仍大，但下方25400水平卻見支持，而100日線(25188)亦能守穩。今早恒指高開124點，早段升幅曾收窄至104點，低見25615後，又再重返20日線之上，大市最多升289點，高見25800，但未能企穩250日線後現回吐壓力，半日升174點或0.68%，報25685。暫時恒指喺10日、20日及250日線之間穿梭，尤其呢幾日期指轉倉高峰期，愈玩愈窄，基本就係唔上唔落。大市半日成交1399.17億元，北水淨流入13.23億元，北水都係彈出彈入。 雖然重磅科技股受阿里巴巴(09988)配股影響，表現較為疲弱，但連續兩日見管理層甚至創辦人出手爭持，對股價有一定提振作用。至於傳統金融股則擔起支撐指數作用，不過科技股大部份喺業績公布後見光死，令大市動彈不得，持續於幾百點窄幅上落。而港股自6月低位反彈逾3000點後，目前於25200-26200水平之間進行整固，日線保力加通道持續收窄，目前通道頂部為26133，底部則為25189，似乎喺本周五期指結算前，受轉倉活動所影響仍未見突破，並持續圍繞20日線附近二三百點之間上落，估計要待結算過後再見突破。留意全國人大常委會會議正舉行，並於周五結束，如在此期間會議釋放超出預期政策信息，或有助提振大市；而美團(03690)則於周五公布業績；今晚美國將公布重要通脹數據，會否為其後息率路徑提供更明確方，上述幾個因素均能左右後市發展。