【盤房來料】 港股雖反彈惟成交未能配合(261026).docx

港股雖反彈惟成交未能配合 科技股拋售潮暫紓緩，但布蘭特期油一度漲破每桶117美元，令通脹憂慮升溫。美股上周五反覆偏軟，道指周五曾挫812點，收市仍跌652點或1.23%，報收52215；標指39點或跌0.52%，報收7623；納指反覆跌53點或0.21%，報收25955。個股方面，SpaceX據報尋求打造美國第四大全國流動網絡，另有傳馬斯克已向美國娛樂集團派拉蒙Skydance投資約10億美元，當晚股價彈返1.8%，但仲未上返150第一注個買入價，下面140第二注買盤亦唔中，今早夜盤喺148左右，暫靜觀其變。再睇下個短炒組合，META中咗650一注，630另一注唔中，暫時夜盤喺641，都係等下先。繼續用個600做防守。至於GOOG貪心小狗換來捱價嘅懲罰，好在係350減咗半注，暫時328剩低半注未走，330-340係5日、10日同20日線所在，暫時未再加貨，呢個星期聯儲局議息，未有議息結果前，阿Man打算以守為攻，唔會太大膽加倉住。INTC喺85加多咗一注貨，拉均價都要接近90成本，帳面仲要坐艇4%。NBIS加多咗注160之後，均價要175，上周五160企唔到，暫時150個防守位叫險守，帳面輸緊接近15%，其實就已超出晒阿Man可以撞受嘅範圍，睇埋今晚上唔返160企返條50周線同250日線，都可能要撤退。DELL叫做有少少反彈，465中完一注，450都中埋，均價457.5，暫時和和果果，望今晚企返465條100MA反彈。MU兩注中晒，870均價買返一部份，呢隻叫做撈返之後無坐艇，呢兩日反彈要先企返上900-920。MSFT守到520就繼續持有，同樣呢啲價嘅微軟唔算貴，加上有平貨底，防守方面都係繼續用500，但520個止賺位最好守住。NQ今晚分水嶺29100，支持29000/28900/28800，阻力29200/29300/29400，料波幅收窄靜待聯儲局議息。 據美國銀行引述EPFR Global資料顯示，截至10月21日為止一周，全球股票基金錄得556億美元資金流入。當中，美股基金再吸資67億美元，歐股基金再流失10億美元資金；中國跟南韓股票基金分別吸資170億美元和58億美元，兩者都係7月以來最多；債券及黃金基金分別錄得121億美元及26億美元資金流入。明明話避險，反而未見資金以現金為王道，資金主要由歐洲市場流出，但量嚟講又唔算好大，但美股、美債仍然吸引資金流入。尤其係避險情緒升溫，美債近日重拾避險功能，喺AI概念股拋售、法國市場動盪以及中東緊張局勢升溫之際，資金流入美債避險；美國10年期債息周四最多急跌18個基點，創逾一年最大跌幅。美國10年期債息周五曾升5.2個基點，報5.001厘；息口敏感嘅2年期債息升6.57個基點，報4.7053厘。美滙指數一度彈0.24%至101.85；日圓跌0.19%至157.16兌每美元。但黃金並未發揮避險作用，現貨金失守4000美元。 港股上周於長周末假期後持續下跌，至周五才以小陽燭回升158點，至23093收市，按周計仍跌1093點或4.51%，表現強差人意。雖然上周已有大量牛證街貨被回收，但目前仍以牛證街貨略多於熊證，喺缺乏宏觀利好因素推動下，暫時弱勢難改，只係短線嚴重超賣下，有技術性反彈亦不足為奇。恒指高開63點，報23156，一開波又跟A股插水，其後表現反覆，一度轉跌最多83點，低見23009，23000守住回穩。A股上半場跌幅收窄，大市逐步收復失地並回升，最多升123點，高見23217。恒指半日收報23193，升100點或0.44%。大市半日成交930.41億元，北水淨流入8.92億元，終止連續八個交易日錄得淨流出，但半日咁嘅成交額，當然唔算合格。 今周將迎來超級央行周，包括美國聯儲局、歐洲央行、日本央行等本周宣布利率決議，市場普遍預期這三大央行將按兵不動。至於港美巨企業績繼續輪流上場，數據方面，美國第三季國內生產總值(GDP)初值出爐，料本周港股仍有震盪。不過本周四為期指結算日，本周將進入轉倉高峰期，此期間喺轉倉活動下，指數或於窄波幅，於區間內上落完成轉倉。值得留意恒指弱勢未改，資金流向方面亦欠缺支持，北水連續多日錄得淨留出，而技術走勢上，10日、20日、50日及100日線均呈下壓形態，短線反彈暫僅視為跌勢中後抽，留意若大市基本連20日線亦未能收復並企穩，反彈過後將繼續向下尋底。短線支持為23000/22800，失守下方支持22600/22400。上方反彈阻力23200/23400/23600，企穩23600為持續反彈最低條件。