【盤房來料】 港股如失26300頸線走勢明顯轉差(020326).docx

港股如失26300頸線走勢明顯轉差 美股於2月份表現麻麻，尤其科技股表現遜色，市場擔憂科企有關人工智能過度投資，資金轉投傳統股份，令標指及納指跑輸道指，而標指於2月份累跌0.87%，係自去年3月以嚟表現最差嘅一個月。不過周末期間，美國及以色列聯手，向伊朗展開軍事行動，而伊朗最高領袖哈梅內伊於襲擊中喪生，德黑蘭政府宣布全國哀悼40日。目前市場預料伊朗舊有政權或瓦解，但新政權能否跟美國再重回談判桌仍屬未知數，估計本周資本市場，包括金屬、股市，匯市，以至能源市場均會持續波動。上周五提及嘅CRWV同ALAB都已穿咗防守位，正路都止賺咗先，咪一味死坐。至於NVDA，就回落到支持區，今日吼位喺175-178美元撈返一注，暫時用170做防守，穿咗170美元可能先撤退。NFLX放棄收購華納，股價反而喺上周五急彈逾一成，因為公司資金壓力大大緩解之餘，仲收返28億美元嘅分手費。其實Netflix放棄收購華納可能係好事，雖然少咗個電影庫，但Netfilx可以預留更多資本進行製作，股價急升後見回吐，如果守到85美元，可以考慮上車，用返個85美元做防守。至於NQ今日個分水嶺喺24700，首個支持係24600，下一支持係24400，盤中較大支持係24200-24250；至於反彈首個阻力係24850-24900，下一阻力25000-25050，盤中最大阻力係25150-25200。 至於港股上周一恒生指數以裂口爆升668點，當日曾收修復5日、10日及20日線，可惜升勢無以為繼，翌日再度失守三條平均線，其後反覆爭持，至周五雖反彈至26630收市，全周計恒指回升217點或0.82%，但2月份恒指卻累跌756點或2.76%，走勢明顯轉弱，尤其科指表現更差，不僅早已跌穿有牛熊分界線之稱嘅250日線(5586)，甚至一直處於全部移動平均線之下。而恒生指數於周五夜期及ADR時段，隨美股走軟向下，恒指又打回原形，重返26500水平之下。周末期間，美國及以色列向伊朗發動聯合攻擊，黑期順勢而下，跌至26300水平，今早恒指低開，恒生指數低開324點，跌幅一度擴大至747點，低見25882，但未有進一步下試1月低位。半日恒指跌420點或1.58%，報26209；國企指數跌120點或1.36%，報8738；科指數跌107點或2.09%，報5030。主板成交1935億元，以半日跌幅嚟講，其實沽壓又唔算好嚴重。 哈梅內伊之死，或令中東地緣局勢更趨惡化，但同時亦有機會令美伊加快返回談判桌，暫時中東局勢仍動盪。不過恒指自1月起已開始呈頭肩頂形態，今早更跌穿26300頸線支持，技術走勢明顯轉差。若然頭肩頂形態成立，失守頸線以量度跌幅計算，恒指調整幅度可低見25100/24600水平。暫時以1月低位25700水平為首個支持，25100為下一重要支持。如本周能重返26300企穩，則有望緩解下調壓力，如未能重返此水平企穩，則調整壓力加大。如中東局勢持續緊張，油價持續高企或推高通脹，或削弱減息空間，對股市屬利淡。 展望本周，內地將舉行人大會議，市場將聚焦經濟增長目標、赤字率、財政刺激力度、以至不同行業政策等對資產市場帶來潛在影響。而本周港股及美股有唔少重磅股公布業績，相關股份業績表現仍左右大市表現。不過多重陰霾仍籠罩全球資本市場，市場避險情緒高漲，料港股再向下尋找支持機會較大，不排除恒指將跌穿1月低位。如港股無法企穩26300，日線圖頭肩頂形態影響下，大市將先下試25500-25700水平尋找支持，如跌破25500水平，進一步向下考驗25000關。至於反彈阻力為暫為26300/26500/26800，如無法重穩26800企穩，大市調整持續。