【盤房來料】 港股26300頸線得而復失暫險守二萬六(170426).docx

港股26300頸線得而復失暫險守二萬六 美伊停火計劃再進行談判之際，美國總統特朗普宣布以色列與黎巴嫩將停火10天，又表示伊朗承諾超過20年內都唔會擁有核武器，而美伊下次會晤可能喺本周末舉行。消息帶動美股周二反覆向好，標指與納指齊創即市及收市歷史新高，納指連續第12個交易日上升，創下2009年以來最長連升紀錄。美市收市，道指報48578，升115點或0.24%；標指再升18點或0.26%，報7041；納指升86點或0.36%，報24102。反映中國概念股表現嘅金龍指數攀升1.74%，報7192。 噚日有提到，短線唔少股份都開始超買，TSLA預咗400美元係阻力，有提到可以隨時起筷，結果時間啱啱好，等下個市做回吐，吼下有冇370-380美元上返車。至於NBIS，ONDS同CRWV，暫時回吐幅度唔算大，但都係先食咗部份貨套利，游下水持減持貨成本亦無壞。至於Netflix盤後公布業績，業績指望令人失望，加上聯合創辦人兼執行主席Reed Hastings於6月任期屆滿後，唔再連任董事職務，結束長達29年集團管理角色，觸發Netflix盤後股價跌10%。早幾日擔心上唔到車，無等埋業績公布，就已先買咗一注103美元，冷不防業績急回，真係有原定嘅95-98美元上車位，既然咗價，97美元落多一注，拉返個平均價去100美元，防守位仍然係90美元，有信心NFLX今年之內上得返120美元。 講到個NQ真係升足12個交易日，早段跌穿個26350分水嶺之後，一度落過26250水平附近，但第一個支持位已止跌回升，雖然話估頂無意思，但噚晚就真係去到26550-26600行人止步。暫時都係睇個NQ開始要做下整固，回吐壓力唔大，今晚個好淡分水嶺喺26500，下方支持26400/26300/26200，阻力暫時26600先啦，美股真係好難估，超買可以更超買，但連升12個交易日，唔回調點都要抖下。順帶一提，美伊大機會喺周末再進行新一輪談判，就算今晚盤中有回調，短線博回調做淡都唔好太取進，見好要識收，咪大安旨意留住個淡倉過周末。 至於港股噚日高開175點後，最多曾升455點，見26403全日高位，收市升446點，以26394接近高位收市，連升三個交易日。成交額2562億元，未見價量齊升，成交未能配合升勢。恒指由上月低位反覆回升逾二千點，雖然有北水流入，但流入資金有限，亦未見有更多其他資金流入，加上股份表現較分化，資金似乎炒股唔炒市，而個別重磅股超買下，短線再上升動力有限，料26500-26600水平有一定阻力。雖然隔晚美股續升，但港股夜期及ADR則偏軟，即使反映中概股表現嘅金龍指數升逾1%，ADR及夜期未有跟隨。今早黑期於26300水平之下徘徊，港股略為低開，恒指今早低開逾百點後，跌幅反覆擴大至超過300點，跌穿100日線(26077)，暫守50日線(26003)。恒指中午收報26046，跌347點或1.32%。國指跌114點或1.28%，報8790；科指跌84點或1.66%，報5007。半日大市成交1260.65億元，呢個星期成交都算靜，雖然北水淨流入56.57億元，但預咗周末前夕，資金唔會太積極入市。 睇返恒指由上月底24300水平回升至今，累計已升超過2000點，甚至已重返全部移動平均線之上，而5日線已先後升穿10日線、20日線及50日線，出現黃金交叉反映大市不已扭轉跌勢，甚至回復強勢，有條件再展升浪；不過個別重磅股已呈超買，至現水平或要抖抖，即使未必出現深度回吐，但高位整固機會仍大。預期短線於26000水平有初步支持，而下一支持為25800即10日線水平附近，下一支持為25600，至於25400至25500水平料支持力度更大。短線26500水平即日線保力加頂部有一定阻力，而26800/27000水平阻力更大。