【盤房來料】 恒指留意26600或成短線阻力(120126).docx

恒指留意26600或成短線阻力 美股上周五反做好，道指與標指齊創收市新高，標指盤中亦破頂，標指盤中一度升0.82%至6978，收市彈升幅收窄至44點或0.65%，報6966；道指升最多305點，收市升237點或0.48%，報49504；納指曾升1.03%，收市仍升191點或0.81%，報收23671。上周五市場觀望美國最高法院周五就特朗普政府關稅合法性的案件作出裁決，然而當日法院未有裁決結果，預期本周三或有裁決，預期裁決結果或對股市帶來震盪。地緣政治局勢仍緊張下，金價再破高位，今早於下周時段逼近4600美元，有分析預期金價於上半年或衝上5000美元水平。根據美國銀行引述EPFR Global資料顯示，截至1月7日為止一周，全球股票基金錄得22億美元資金流入，但美股基金出現190億美元贖回，期內黃金及加密貨幣基金則吸資11億美元。不過今早傳嚟美國向美聯儲局向鮑威爾發傳票，威脅向其作出刑事訴訟。呢個消息令到道指期貨(YM)及納指期貨(NQ)喺亞洲時段雙雙回落。其實特朗普一直睇鮑爺唔順眼，認為聯儲局過份保守，唔肯進取減息，但聯儲局則基於經濟數據去決定減息進度，暫時美國經濟暫無衰退危險，而喺關稅影響下，又怕通脹死灰復燃，聯儲局減息進度保守亦無可厚非。如今威脅起訴鮑威爾，等同向市場釋出聯儲區獨立地位被動搖嘅訊息，難免為美股提供一個回調藉口。 不過美股喺2026年開局後，道指跟標指再創新高，走勢維持強勁，只係納指一直表現落後於道指及標指，主要係科技七雄持續落後整體大市，窒礙納指再破頂。暫時睇返個NQ，喺25700水平進行整固，上方25950-26000阻力不破，下方25450-25500又有頗強支持，繼續喺呢個range炒住上落。個股方面，今晚留意下中概股萬國數據GDS，38至39美元上車，用返個36美元做防守，短線目標睇返個42元高位，有冇得再破頂就要睇再有無新資金流入此股。至於重磅股TSLA，吼返個438-440上車，用個430-435做防守，短線睇下打唔打爆返個450再上480美元，只要機械人同自動駕駛概念繼續當炒，加埋SpaceX今年上市，TSLA會係科技七雄之中，除咗GOOGL之外，另一隻阿Man較為睇好嘅納指七雄股份。 至於港股上周先高後回，恒生指數周二高見26858近兩個月高位後，連續兩日回吐逾500點，周四一度略穿26000，低見25960，至周五略為反彈82點，報收26231，按周仍要跌107點或0.4%。港股於上周先高後回，回吐幅度已達本月暫時波幅回調黃金比0.764，回吐幅度較大，不過周五晚夜期及ADR反彈，重上26300水平之上，即重返本月波幅黃金比0.5之上，升勢未至完全扭轉，本月餘下時間能否進一步向上挑戰去年10月初高位，甚至升破此關，則要觀察本周港股能否企穩26500水平。半日恒指報收26456，升224點，半日成交額1683億，下半場睇下彈唔彈返去26500-26600，一旦反彈至26500-26600水平再遇阻，咁今日反彈或者係咁先。其後回調再睇個26200守唔守到， 若然跌穿返26200，並重返26000水平之下，再失20日線即25800水平，則有機會完成反彈，繼續調整。留意本周美國法院周三對關稅進行裁決，或對環球股市帶來震盪，至於相關影響，已於上周五曾作分析。而本周三內地將公布12月進出口數，美國較重要數據為12月CPI，將影響聯儲局議息取向及減息幅度。 至於今日下半場期指同夜期，就睇住個26350作為好淡分界線，企到26350有望再挑戰26550-26600初步阻力，港股上半場暫時跟住A股升勢繼續反彈，留意現貨有個頸線位喺26535，企到喺上面，後市再睇高一線，企唔得返，有機會上周二個26858係短線高位，並形成反彈一浪低一浪走勢。而下方今日個支持好明顯係條10日線約26200，上周見10日線升穿50日線，形成咗個黃金交叉之後，周二及周三調整，通常出現金叉或死叉，成日會出現短線反向，經兩日調整後，周五靠穩，若然呢兩日收復26550-26600兼企穩，咁26858就未必係今個月個高位，有條件向上擴大升幅，完成月波幅1500-1800點，咁上面先睇27000/27200/27400。相反，呢兩日跌穿返26000，呢個多條周線同50日線及100日線嘅匯聚區，咁向下擴大波幅完成1500-1800點月波幅機會較大，下面睇返25500/25300/25000。阿Man 睇時睇個25800-26000支持加不俗，除非美股有乜冬瓜豆腐，否則條20日線無咁易穿；但係上方個27000-27200阻力亦唔細，要突破非要有新資金流入，成交再加碼先有條件突破創新高。個股方面，留意下小鵬(09868)開始做橫行平台收集，集團亦正加速海外擴張步伐。隨著對AI晶片、自主智駕等持續投入，有望為其長期增長注入動力。72至78元收集，穿70元止蝕，完成收集睇82元阻力能否突破企穩，企穩82元，首個目標先睇90元。