【盤房來料】 港股需守26800否則向下補裂口(150126).docx

港股需守26800否則向下補裂口 先講下美股噚晚三大指數齊齊調整，由於伊朗局勢緊張，市場關注華府如何應對伊朗血腥鎮壓示威活動，道指一度跌逾300點，其後跌幅收窄至42點，但納指則跌238點，主要係幾隻重磅科技股亞馬遜、微軟、Nvidia及思科齊齊腳軟。噚日講過地緣局勢仍緊下，金價高處未算高，暫時喺4600美元水平附近整固，短線支持先睇4580同4510，有機會回到4400-4450嘅話就要出手。NQ仲未走出25400至26000呢個區間，日線圖出咗個小圓頂，留意25400不容有失，跌穿呢個區間底部支持，下個支持位係25000-25100。今晚NQ嘅好淡分界線暫下移至25600，上方阻力為25700/25800，下方支持25500/25400，留意25400失守，跌勢或會加劇。 個股方面，RDW去到第一個阻力位10.9，暫時未見有回吐，企得穩就由阻力變支持，下個位睇11.8。至於AMD等緊位收集，留意住NQ走勢，若然跌得穿25400，200美元應該有位上車。年初提過量子股板塊都會係今年美股一個重要主題，IONQ為全球第一間純量子計算上市公司，公司主要業務為量子運算技術研發及軟硬體商業化，將量子技術帶出實驗室並應用於商業、工業及學術。吼位喺48-49美元上車，用個47美元做防守，目標睇52-55先。另一隻量子公司watch list係QBTS，公司係全球領先量子計算系統及服務供應商，提供量子電腦硬體、雲端平台Leap、混合解決方案，服務於國防、金融、能源等領域，公司仲蝕緊錢，但睇好佢喺量子計算領域嘅長期發展潛力與技術突破。要炒QBTS又係要有心理準備，股價波動性較大，吼位29元左右上車，27做個防守位，目標係30-32美元。 至於港股今早低開27點後，恒指一度拗腰倒升207點，高見27206，略為升破去年11月高位，但難敵A股跌勢，半日恒指跌147點，報收26852。阿爺出手為內地股市降溫，港股點都跟返A股回一回，留意周二上升裂口26608至26729仍未回補，今日若然跌穿26800，好大機會回補裂口。雖然目前港股氣氛仍算良好，不過已連升多日嘅內地股市，喺阿爺出手為市場降溫下，料升勢或受阻，即市使強勢下未必會出現大幅度調整，但如在高位整固，港股同樣而要抖抖氣，短期或於窄幅上落，未必能企穩二萬七關。不過有啲意外佢今朝仲出多個高位，可能係為咗滿足本周波幅，剛好做夠1000點周波幅，至於下周有冇本事再上去27000樓上企穩，再向上擴大波幅，再挑戰去年高位甚至27500，都係要睇A股表現。港股要更上一層樓，需要更多催化劑，如A股回復升勢及待業績期展開後，由理想企業業績去支撐大市上升。