【盤房來料】 恒指仍穿梭於幾條移動平均線之間(270226).docx

恒指仍穿梭於幾條移動平均線之間 Nvidia業績交足功課，可惜股價僅於公布當日盤後升至200美元後又掉頭，噚日美股開市更回落，始終市場未能消除對人工智能(AI)泡沫嘅擔憂，拖低整體科技股表現，資金輪動換至其他板塊，美股周四個別發展。道指高開62點後，升幅擴大至最多333點，其後一度倒跌244點，收市回穩，微升17點，報49499；標指跌37點或0.54%，報6908；納指跌273點或1.18%，報22878。美股暫時仍於高位震盪，但科技股明顯跑輸大市，市場無法對AI泡沫釋疑，MAG 7持續於區間上落，資金只係游走於不同板塊。NVDA似乎仍然喺175-205美元之間上落，醒目嘅一出完業績，200美元可以減持部份持倉，待回落至175-180水平，又可以搵位上返車。CRWV企唔到95美元呢個短線防守，盤後又又一嘢插水返去返90美元樓下，95美元止賺咗嘅，留意返85-88呢啲防守位，守唔到要小心進行較深度調整。ALAB仍然係短線支持位徘徊，有貨都係用返122做防守，收市都穿呢個位，先行減磅或撤退亦無壞。至於個NQ，噚日都算容易炒，25400就見阻力試沽，穿埋25300分水嶺加注淡倉，25000呢啲支持位平淡倉，雖然盤中見過24900水平，食唔盡都有三四百點利潤。至於今日NQ個分水嶺係25050，首個支持24950，下一支持24850/24750，上方首個阻力25100-25150，下個阻力25300-25350；暫時25400-25450阻力仍然大。 港股噚日高開低走，恒生指數高開254點，早段一度升258點見27024高位，但20日線僅曇花一現，未幾已重返27000水平之下，掉頭回落再失10日線及5日線，半日跌至26600水平爭持。中午港交所(00388)公布業績勝預期，收入及溢利均創半年度歷史新高，港交所午後扭轉早段跌勢，倒升收市，但無助大市止跌，午後反而喺科技股跌勢加劇下，恒指跌穿26400水平。午後跌勢加劇，最終跌384點或1.43%收市，幾乎以全日低點收市，報26381；國指跟科指跌幅更超過2%。成交額2592億元，當中北水錄得逾70億元淨流出。見到噚日下半場個走勢，再加埋夜期一度插水低見26200水平，以為今早大市會做返夜期啲低位，順手落去劏埋26200-26300肥牛，咁又估錯晒。港股繼續同你玩單跳，日升日跌，北水連續兩日錄得淨流出後，今日終見淨流入逾25億元。恒指今早高開66點，報26447，早段升抵50日線遇回吐壓力，升幅一度全數蒸發並倒跌5點，低見26375，已經第N次去到100日線附近見支持反彈，目前100日線於26327，今日又再一次守咗條100日線，其後好友發力推高大市，恒指最多升225點，高見26606。恒指半日升197點或0.75%，報26578，50日線失而復得，26200-26300嘅重牛區，又幸運地避過一劫。 國指升35點或0.4%，報8849；科指喺嚴重超賣下反彈53點或1.04%，報5162。 目前港股表現較為分化，金融股及傳統股明顯跑贏，但科技龍頭毫無動力，走勢更每況愈下，暫時有波幅，無升幅，跌得急就彈一彈，但反彈力度只係一般。唔少重磅科技股將陸續於下月公布去年全年業績，市場憂慮內捲拖累相關股份盈利表現，所以科指近日一直跑輸。此外，龍頭科企嘅人工智能(AI)業務發展，亦未足以令投資者願意付出高估值，因此科指持續疲弱，持續跑輸大市之餘，更早已跌穿有牛熊分界線之稱嘅250日線，被市場視為已結束牛市行情。受重磅科技股拖累，港股今年以嚟一直跑輸其他市場，除非科指扭轉劣勢，否則港股難以向上突破，暫時或僅於區間移動，一旦短期再失守重要支持位，即26200-26300，此水平為恒指日線頭肩頂形態之頸線位置，一旦失守，港股不僅再向下考驗1月低位，甚至出現更深度調整。目前市場仍寄望3月內地舉行人大會議，會上或有更多政策公布為市場沖喜，以及重磅科企於3月公布業績，能否為市場目前困局帶來改變。短期留意26200-26300水平支持，失守下方支持為26000/25800；至於反彈阻力為26600-26700，至少要企穩26700及重返27000水平之上，港股方能解除下破1月低位危機。