【盤房來料】 港股暫需整固 待戰事明朗化再考慮加注(270326).docx

港股暫需整固 待戰事明朗化再考慮加注 市場擔心美國與伊朗或未能達成停火協議，因為雙方分歧太大，加上有消息指美國於中東再加大兵力，以便隨時向伊朗發出最後一重擊，消息刺激國際油價再度回升，美股周四急跌。道指收市跌469點或1.01%，報45960；標指跌114點或1.74%，報6477；納指跌521點或2.38%，報21408。紐約期油噚晚一度抽高5.67%，每桶高見95.44美元，雖然今早於亞洲時段略為回落，但一直高企於90美元之上。油價飆升加劇通脹憂慮，經合組織(OECD)最新展望報告預測二十國集團(G20)成員國今年平均通脹將達4%，較去年12月估算跳升1.2%，美國通脹預測亦以同等幅度調升至4.2%；經濟增長預測維持2.9%不變，並指如果無今次衝突，經濟預測會上調0.3%。經合組織指出，衝突程度及維持時間不確定，能源價格若長期高企將大幅推高企業成本及消費者物價，繼而削弱經濟增長並可能觸發金融市場重新定價。正正因為油價高企，令近日環球股市持續震盪。德國央行行長Joachim Nagel於路透訪問中提到，如果伊朗戰爭導致物價前景轉壞，歐洲央行4月加息係選項。不過，貝萊德全球定息收入投資總監Rick Rieder於訪問中呼籲美國聯儲局減息，淡化市場對加息揣測。佢坦然，利率高企損害小企業、年輕及低收入人士，雖然能源價格波動意味減息方面要有耐性，但仍認為當局應迅速採取行動。 美股噚日重磅科技股氣氛麻麻，主要係Google及Meta均被罰款，其中Meta急跌8%，創去年10月30日以來最大單日跌幅。集團呢個星期連輸兩單大官司，雖然罰款金額相對於公司規模而言並不大，但Meta喺法庭上失利，大型科技公司喺社交媒體安全及平台言論自由保護方面角色被質疑。不過550美元左右嘅Meta，又有啲吸引力，博反彈用返個530美元做防守，博彈返600美元都有水平。至於Google又係到咗可以博一博彈嘅水平，用個260美元做防守，企得穩280美元，博股價上返300-320美元。至於NQ穿咗個24000就急轉直下，股價落到23700水平先有支持，今晚NQ好淡分水嶺23850，支持23750/23650，跌穿23600料跌勢將加劇，呢個位真係不容有失。反彈方面，留意24000會否由前支持阻力，企得穩24000，上方阻力24100/24200，暫時24400阻力唔少。 環球股市仍然受中東戰事消息所影響，港股亦難獨善其身，港股昨日亦再失守二萬五關，恒生指數收市跌479點或1.89%，報收24856，成交額則減至2616億，較上日顯著減少千億元，反映跌市中，沽壓未算太嚴重。雖然美伊雙方有意停火，但由於雙方分歧仍大，目前美伊戰事能否終止仍有待觀察。中東戰火仍持續下，隔晚美股三指數顯著下跌，其中反映科技股嘅納指更跌逾2%，拖累港股夜期及表現偏軟，ADR較昨日恒指收市跌逾百點，而夜期仍低於24800水平收市，今早黑期於24700水平徘徊，今早港股低開。不過今早港股卻低開高走，主要係侵侵表示將與伊朗談判限期死線延至4月6日，呢段時間唔會再狂炸伊朗嘅能源設施，恒指隨黑期低開87點，開市早段跌幅曾擴大至143點，見24712半日低位，隨住A股低開後回升，恒指高位一度升139點至24995，半日升135點或0.54%，報24992；半日成額1357億元，中規中矩。由於港股昨日無法企穩250日線，即約25100水平，大市即再現沽壓，收市跌穿25000水平，連5日線亦不保，幸而今早再重返24900水平，企返條5日線後再發力，下半場有望再挑戰250日線，即25100水平，如果企得穩24900，甚至25000之上，下周一期指結算，應該可以保持喺25000樓上，加上周二係月結同季結，阿Man估計下周初可以保持到喺25000水平之上結算。 值得留意係目前全球股市仍受中東戰事困擾，不過因戰事下油價持續高企，如油價長期維持高位，最終將推高通脹，甚至拖累全球經濟增長，而通脹重燃下，不僅難望減息，貨幣政策更有逆轉可能。如美國經濟放緩，甚至陷入倒退，而同時又受通脹威脅，演變為滯脹，美聯儲局將陷入兩難局面。暫時港股仍未修復250日線，技術走勢上係麻麻地，不過特朗普係一個聰明商人，而目前佢嘅一舉一動，正反映佢已有意停戰，只要雙方能重返談判桌，一個消息已可以扭轉目前弱勢。阿Man暫時又唔係太悲觀，一旦美伊戰事結束，港股能修復所有移動平均線，重返26200水平，港股或有望重拾升勢。當然，暫時美伊戰事仍有唔少不確定性，加上復活節長假將至，呢段期間係要保守啲，唔悲觀嘅同時亦唔會太進取，預留一定數目嘅現金，待戰事明朗化，港股確認重拾升勢，再加注加倉亦未遲。