【盤房來料】 港股結算前或於二萬六水平爭持(270426).docx

港股結算前或於二萬六水平爭持 市場憧憬美伊談判可望打破僵局，標指及納指周五齊創即市及收市新高，收市分別升0.8%及1.63%，美股繼續gogo 高。雖然道指曾跌224點，收市跌幅收窄至79點或0.16%，報收49230；標指收市升56點或0.8%，報收7165；納指升398點或1.63%，報收24836。Nvidia自去年10月以來首次破頂，盤中高見210.95美元升5.7%，收市升4.3%創新高報208.26。英特爾再升23.6%，AMD升13.9%，亞馬遜升3.5%。 又睇返手上嘅貨，CRWV果然回落去返115樓下，賣大包連108-110美元都上到車，防守位用返個100美元，撈返半又游吓水。NBIS上周五跌穿咗150美元，今晚望下150美元企唔企得返上去，上唔返食埋另一半先都無壞。至於ONDS撈完貨10.25美元，暫時等下先。本來想博MU，但等唔到450-470嘅上車位，股價盤後更突破500美元，阻力竟然無阻力，如入無人之境。RDW仲係死死下，守到9.5美元，望佢生生性性，快啲上返10美元樓上。留意本周有唔少重磅股公布業績，包括周三有AMZN、GOOG、META、MSFT、 QCOM；同埋周四到AAPL，呢堆重磅股業績後表現如何，將直接影響美股氣氛同表現。另一方面，本周亦迎來央行超級議息周。美國聯儲局、日本央行、加拿大央行、歐洲央行均會於周內議息，議息結果可能牽動金融市場走勢。值得留意。至於NQ升到唔識停，納期打爆個27000後頭也不回，上周五高見27400水平，今早亞洲時段雖然曾回落至27300水平，但兩下又企返上27400，承接日韓台股市持續向上，NQ衝破27500水平，暫於高位徘徊。今晚NQ個好淡分水嶺喺27450，支持27350/27250/27150；上方又講阻力都係無乜意思，但短炒都畀返個27650/27750做阻力，其實短線仍然持續向上，似乎睇住支持位更有用。 周末期間，美伊雙方並未有會面談判，美國防長海格塞斯表示，美方對伊朗嘅封鎖正向全球擴大，未經美國海軍許可，冇任何船隻能從霍爾木茲海峽駛往世界任何地方，消息刺激油價回升，目前紐約期油仍高企於90美元水平之上，但顯著市場對中東戰事敏感度已大減。今早恒生指數低開1點，早段曾跌119點至25858，其後則回升107點，見26086半日高位。中午恒指報收26016，升38點或0.14%；國企指數升18點或0.21%，報8794；科技指數升64點或1.3%，報4966。日、韓及台股高處未算高，反而港股仲喺26000水平吽吓吽吓，暫時未見動力重上二萬七。中港股市相對落後，都係阿爺有所動作，重磅科技被綁手綁腳；據知情人士表示，包括國家發展和改革委員會在內的監管部門近期要求一啲科技公司，除非明確獲批，否則不能接受來自美國嘅投資。其中一位人士稱，正在尋求上市AI大模型企業月之暗面已收到相關指引。另外一位人士稱，階躍星辰亦到了同樣通知。知情人士稱，此舉係喺Meta Platforms Inc.收購Manus之後，中國官方採取舉措之一，意在阻止美國投資人喺事關國家安全敏感行業取得相關中國企業股權。呢個消息唔多唔少窿礙科技股升勢，從而影響指數整體表現。喺其他市場已重返美伊戰爭開打之前水平，甚至創新高之際，港股雖仍未收完全收復開戰前失地，但暫時中線回升局勢未有破壞，加上恒指支持區，已由之前25000-25400水平，上移至25600至26000，目前正於此水平打造另一個支持區。而由4月初以嚟，連續兩周北水均錄得淨流入，有助恒指於25600-26000水平築底。雖然港股目前表現仍落後多個股市，但IPO方面表現出色，首季港股IPO集資額已超過1000億元，為全球IPO市場冠軍。顯然港股IPO成為資金主戰場，大量資金鎖定於新股凍資與半新股炒作之中，令大市於調整時承接力僅集中於熱門板塊，對恒指整體支撐反而有限，向上動力不足。暫時恒指或於25500-25600水平有不俗支持，但上方26400-26500阻力仍大。本周港股亦有唔少重磅股開始派發首季成績表，包括港交所(00388)、中海油(00883)、平保(02318)及比亞迪(01211)等，如果呢啲重磅股業績後爭氣啲，恒指或於結算後發力。