【盤房來料】 中港股市跟外圍股市背道而馳(270526).docx

中港股市跟外圍股市背道而馳 憧憬美國與伊朗最終達成停火協議，加上美國債息回落及科技股強勢，美股周二假期後復市個別發展，道指高開106點後，升幅擴大至最多205點，高見50785，其後曾倒跌223點，至50356；不過標指跟納指又再創即市及收市歷史新高，美市收市，道指報收50461，跌118點或0.23%；標指升45點或0.61%，報7519；納指升312點或1.19%，報26656。個股方面，MU真係學精咗，讓子彈飛無錯，結果UBS出個報告，大幅調高佢個目標價，由535美元調高至1625美元，即係噚晚開市價計，仲有超過100%先到目標價，直情恰埋對眼唔睇，結果今早上到最高950美元水平，較我個撈貨價700，升30%有突，短短幾日間急升，再加上逼近1000美元呢啲心理關口，忍唔住947沽咗四份一貨出去，家下留低嘅貨，就用個880-900美元做防守止賺，睇住先。CRWV雖然仲喺100美元上方，但就無乜力水，自從段永平上季清咗倉，確係動力減弱咗，但以其估值計算，相對又唔算太高，繼續hold住先。INTC喺120美元之上高位整固，破咗頂就推止賺，防守位推到110-115美元。NBIS喺200美元之上進行整固，防守位已推高至200美元，無穿就等下先。呢轉除咗走甩咗ALAB，另一隻RDW都係被佢放飛，完全錯過，記得4月底穿咗9美元防守位，8.9美元止蝕咗，就幾乎遺忘咗佢，其後重拾升浪，上返12美元，更加唔想追貨，結果噚日一開即破頂，今早盤後交易時段進一步升至28美元，自己信念唔夠無法子，唔想再追條魚尾，唯有同ALAB一樣，完美地錯過升浪。美股特性係愈升愈要追，唔升嘅就係唔升住，NFLX同META，雖然唔算買得貴，但就係唔識行，仲喺買入點附近原地踏步。 NQ繼續精彩，三萬大關一躍而上，開市企到個分水嶺29800後扶搖直上，盤中略穿29800，到未見29700就即彈，識炒嘅見到企AO就即開好倉，用返個29750近開市後低位止蝕，等爆頂。至於今晚個NQ好淡分水嶺喺30050，支持29950/29850/29750/29650，上方同樣唔估頂，目前高位係30150附近，睇下呢個位係咪變阻力。 落後嘅港股何止係落後，直情係墮落，噚日表現反覆，恒指最終上唔返條250日線收市，成交額更增至3594億元，反映沽壓仲嚴重咗。今早亞太區股市全面向好，但恒指僅高開9點，加上A股開市後愈跌愈多，恒指反覆偏軟，一度跌229點至25369半手低位，收市報25382，跌217點，成交額1701億元。重磅科技股一厥不振，港股轉弱已係不爭事實。目前港股仍於250日線水平爭持，加上北水三日累計沽出逾百億港股，反映內地資金對港股興趣減退。值得留意近日港元滙價轉弱，如兌美元觸發7.85弱方兌換保證，或令港元流動性進一步收緊，對港股更為不利。港股明顯落後全球其他股市，尤其較亞太區內其他股市表現弱，主要為本地科技龍頭股，亦為恒指權重股，均非AI及半導體股，未能受惠相關股份受追捧熱潮。近兩星期港股中線及長線市寛持續反覆下跌，反映港股弱勢已成。恒指連續四個交易日受制25700水平，即50日線失守後一直未能收復，亦開始已幾個交易日未能企穩250日線收市，相等於半年以嚟累積大型密集區底部交匯區由支持漸變阻力，遲遲未能收復50日線，令港股往考驗25000心理關口壓力大增。上方除非收復全部移動平均線，方有條件扭轉目前弱勢，反彈阻力25800/26000/26200。