阿爺消息主導玩死參與者 缸邊友自保只有離場
12月27日，部份時間有陽光，早上天氣清涼，天氣乾燥。美股隔晚聖誕假復市，聖誕老人行情延續，美股再上升，不過假日氣氛濃厚，交投較為淡靜。道指略為高開後持續向上，尾段升幅一度擴大至升超過200點，收市升159點。標指逼近歷史高位，升20點；納指則升81點；反映中國概念嘅金龍指數則反彈1.2%。標指連升8周，創2017年以來最長升浪，目前與去年一月紀錄高位4796點比較，只低0.45%，自1969年以來，標指全年最後5個交易日至新一年首兩個交易日平均累升1.3%，市場稱之為「聖誕老人行情」，聖誕升市已於上周五正式展開，預期即使出現回吐也只屬輕微和短暫。
目前美元貨幣基金仍滾存大量現金，由於美股為流動性極強嘅市場，每當美股急跌，呢啲滾存於貨幣基金漑資金，就會入場買貨，成為美股急跌時嘅強大後循，令美股高居不下。相反港股由今年初起，銀行結餘持續下滑，銀行體系結存由超過3000億降至目前不足500億元，港股亦自此一沉不起。呢個正正係美股跟港股嘅分別，流動性強弱，直接影響股市表現。目前美元貨幣基金市值約5.88萬億美元，預期明年開始減息，呢筆錢唔會再長期留喺貨幣基金內，屆時邊一個地區及邊一個板塊最強，資金自然會流去嗰一個市場同板塊。
上週四內銀減息，令上周五早段中港股市明顯造好，及至中午突然有官媒出來發聲，指應該監管遊戲課金問題，引發遊戲股大跌，恒指兩重磅股騰訊(00700)跟網易(09999)急跌，已拖低恒指180點。不過當晚夜期表現異常強勁，反彈至16500水平。即使週二A股3大指數全數回落，晚上恒指ADR又升回16600水平，較上周五港股收市升逾200點，原因係內地呢頭話要監管課金問題，嗰頭竟然批出個百個遊戲新版號，內地A股相關股份反彈，亦預視今日港股將高開，但可以彈得幾多，就兩睇啦。皆因內部傷殘咗，就算反彈，上面亦重重蟹貨。港股已淪為阿爺口術搵食，仲要係阿爺呢個莊家話事，仲衰過賭場，外資撤走唔回頭，本地港資亦唔買，北水炒上炒落靠自己內幕消息彈出彈入，一個咁樣嘅股市，只會趕客走，散戶再傻都唔會一再被割韭菜，又或者係韭菜被割後，生長速度未及收割速度快，唔會再有人參與，成交愈玩愈縮，偶有消息反彈，亦只會成為淡友高位做淡嘅機會。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。