【盤房來料】 港股破前頂有望挑戰二萬八(280126).docx

港股破前頂有望挑戰二萬八 噚日阿Man病鬼咗，感冒菌呢期好厲害，好彩唔係中流感，但食咗藥全人個人迷迷糊糊，基本都無做過任何操作。睇返噚晚美股個別發展，一隻UnitedHealth股價暴跌近兩成，就隊冧咗個道指，道指盤中最多跌549點，低見48862，不過收市跌幅收窄至408點或0.83%，報49003；不過標指同納指未受影響，尤其中概股更標青，一向夠晒波幅常熱炒嘅金山雲KC，噚晚就升咗8.7%，盤後又升近2%，足足升一成有多。阿里巴巴BABA連盤後升幅過3%，反而今早阿里巴巴(09888)喺港股呢邊升唔夠2%，似乎有啲落後。由於熱炒板塊，量子、太空、AI同軍工股等中係熱炒，標指同納指續升，標指28點或升0.41%，報6978；納指升215點或0.91%，報23817。至於阿Man之前打算後業績後急挫嘅INTC，按原定計劃嘅GTC(good till cancel)order，結果喺44美元先中一注，42美元另一注就未有着落，咁就由得佢擺下先。之前有提過嘅太空板塊其中一員RDW，建議喺10美元左右上車，噚晚急升咗近三成，公司獲得特朗普「金頂」項目合約，之前有提到此股今年15美元目標，誰知佢喺Q1已接近目標；暫時個支持位睇返13至13.5美元，防守位上移至11美元。至於NQ噚晚終於打爆咗之前個上落區間，咁今晚就要用返個26250做好淡分界線，下方第一個支持係26150，下一支持係26050，較大支持係25950，最大支持係25850；阻力方面26350-26400前頂；升穿26400咁就唔好估頂住。 港股昨日連續第五個交易日上升，更擺脫之前四個交易日反彈，四日僅累升278點，日線均出現陰燭嘅狀況，昨日明顯轉強，高開高走，全日終以大陽燭收市。恒指昨日高開即重越二萬七關，盤中一度升423點，高見27188高位，收市升361點，報收27126，距去年10月高位27381僅差255點。昨晚夜期時段保持強勢，夜期回升117點重返日市高位，今早黑期更已升穿27200水平。卒之今早一開市恒指高開198點，其後升幅擴大至659點，升至四年半高位，高見27786，半日升勢稍稍回順，半日升598點或2.2%，報收27725，已第六個交易日上升，半日成交額1963億元，以點數半日升近600點計，呢個升幅又唔算好配合，略嫌不足。今日輪到中特股都發力，就連弱咗一陣子嘅中移動(00941)半日都升3%；而三桶油喺油價回升下，升幅由超過3%至5%不等。今日重磅股升勢都算幾全面，雖然整體升跌比唔算好好，但重磅股上得到，指數自然都破頂。 事實上，當外圍其他股市已相繼創歷史新高之際，港股相對落後，不少投行對中資股前景睇法樂觀，而目前不少互惠基金相對認低配中資股，今年稍後時間料將持續增持中資股，中港股市可睇高一線。值得留意係日本財政及政治不穩定，為日圓匯率添壓力，日圓匯持續走軟。雖然近日盛傳日美聯手入市干預，但如日圓匯價反彈短暫，證明干預失效，日圓往後跌勢可能更急。日圓貶值，令日債乏人問津，債價下跌令債息飆升，全球日圓融資鏈一旦斷裂，勢將令估值高企嘅美元資產急跌，最終日本或被迫大幅加息應對。一旦日本被逼大幅加息，日圓套利交易大量平倉風險外溢全球，非但亞洲股市當災，全球股市齊攬炒，不得不提防黑天鵝突擊。不過暫時中港股市表現尚算硬淨，喺估值相對其他主要股市仍低下，具有更佳安全邊際，即使外圍股市大幅回調，港股跟隨震盪，不僅受影響較少，同時亦係低吸好機會。