【盤房來料】 港股迎接第四季暫未見明日顯方向(280926).docx

港股迎接第四季暫未見明日顯方向 油價回調帶動美國短債息向下，道指上周五早段拉鋸，中段傳出美伊談判有啲起色，道指最多升524點，收市仍升478點或0.93%，報51828；標指升39點或0.51%，報7743；納指升129點或0.48%，報收27068。周五晚唔少股份都跟住個指數上咗去，可惜當晚阿Man出咗街玩，完全無理過個美股短炒倉，今朝瞓醒，美股夜盤又腳軟返。META周五晚一度衝到上去接近770，收市倒跌落返751，暫時夜盤進一步回落至732，阿Man喺715嘅GTC買盤仲擺緊，去到10日線前面，唔介意接注，都係用個700做防守。至於MU一向都係睇住個1100做首個目標，其實周晚已達標，若然唔係出咗街玩，應該都係食咗先講。暫時夜盤落到1066，今晚睇下上唔上返條5MA 1075左右。DELL手上一注550嘅貨持有， 20MA已上移至530，取消咗520個買盤，跌穿返條20MA，可能要退守到去500，都係睇定啲先決定加唔加注。NBIS又落返去5MA附近，250呢個關卡未過到，INTC又要抖，暫時NBIS用220做防守，INTC就110做防守。AVAV又運吉，呢件貨似乎同阿Man唔多夾，今晚再睇睇乜嘢環境，150唔守都跳車先。GOOG仍然未上返350，反而MSFT逆市上升，呢兩隻阿Man有信心可以睇高少少，皆因現價市盈率唔算貴，防守力較強。至於MRVL繼續整固，同AVAV相反，MRVL炒咁多次都無失手，暫時用個248做防守，218買嘅貨，基本上已立於不敗之地。至於今晚NQ 分水嶺30750，美股都係盤整中，估計都係呢個位上下三百點度整固下先，支持30650/30550/30450，阻力30850/30950/30050。 習近平結束國事訪問美國行程，與夫人彭麗媛周五喺馬里蘭州安德魯斯聯合基地登上專機啟程回國。習近平訪美期間與特朗普進行會談，特朗普喺社交平台發文形容，兩人會晤對美中兩國嚟講係富有成效，又預告會有重大事情發生，但未有透露更多細節。不過市場對預期中美之間難以徹底化解矛盾，不過美方將關稅談判日子延後，都算係一個利好消息。EPFR Global資料顯示，截至上周三為止一周，全球股票基金走資102億美元，美股基金流出211億美元，為3月以來最大贖回。美國30年期債息一度跌2.55基點至5.4505厘，10年期債息曾降4.57基點至5.1521厘，兩者其後都小幅轉升；2年期債息最多回調5.4基點至4.8703厘。美滙指數一度跌0.41%至100.87，日圓升1.21%。 至於上周港股先升後跌，恒生指數一周累計跌240點，報收24510，雖然整個星期成交維持低迷，未見放量下跌，但可以肯定係港股目前正在陰乾。雖然上周五以裂口下跌，但收市反彈至24510收市，日線形態上出現鎚頭，喺短線RSI 2跌至2-10極度超賣下，出現反彈亦正常。值得留意，上周除周二之外，每日成交股平均成交額均高於20%水平，不排除短線隨時挾淡倉及沽空，加上明日期指結算，指再今明兩天再大幅下跌機會較低，而北水將於本周五開始暫停買賣至下周四才回復正常交易，過往多次於北水暫停交易較長時間，港股均見挾淡倉情況。 至於中美元首會面後，雖達成部份經貿、AI發展等共識，但具體安排仍有待觀察，而中美之間矛盾，亦未見得達成任何突破性共識，難以對大市帶來任何刺激。加上港股目前弱勢未改，即使短線因超賣作出技術性反彈，料上方仍重重袓力，尤其20日及100日線交匯區於25000水平阻力甚大。短線反彈先觀察能否回補上周五下跌裂口24537至25648裂口，如回補裂口之後，無法企穩裂口頂部，料再回復跌勢，再度向下尋底。留意本周三內地將公布PMI數據，如經濟表現仍然強差人意，且看內地有否再推出進一步刺激經濟方案，為港股提供支撐動力。預期港股第四季仍以震盪盤整為主要走勢，目前下行風險略大於上行，指數或於23000至26000之間上下震盪。