港股連升六日或高位先作整固
隔晚美聯儲局議息，此前美股隔晚早段曾做好，標指曾再破頂曾升越7000大關，其後幾乎持平收市，微跌不足1點，報收6978。美市收市，道指報收49015，升12點或0.02%，納指升40點或0.17%，報23857。隔晚美聯儲局議息，一如市場所料利率維持不變，會後聲明指經濟活動一直穩步擴張；與通脹相比，聯儲局亦降低對勞動力市場擔憂，表示失業率已經喺一定程度上表現出穩定跡象，但就業增長仍處於低點。值得留意係聲明中，刪除勞動力市場疲弱風險高於通脹加劇表述，表明隨着官員們認為聯儲局喺低通脹及充分就業兩個目標上更加平衡，政策制定者應採取更耐心態度。對於未來息口路徑，FOMC幾乎未有給予任何明確指引，僅指出政策利率進一步調整幅度及時間，將取決於即將公布嘅數據及經濟前景，暗示對未來潛在利率調整採取更審慎立場。市場預期，聯儲局最快要等到6月先會再次減息，即喺鮑爺完成任期前，利率或一直維持不變。由於FOMC並未對短期利率走向作任何啟示，市場焦點再回到企業業績表現及經擠數據方面。而金價則持續破頂，金價一度逼近5600美元後升勢回順，目前仍企穩於5500美元之上，似乎今年6000美元呢個目標都無乜走雞。
業績方面，Meta收市後公布業績，股價盤後一度急升近一成，之前叫咗Meta喺580美元有支持，600美元邊上車，用580美元做防守，阻力就大約650，結果一個業就打爆阻力位，一個業績都食到呢下升10%嘅短炒升浪。依家支持位上移至650美元，有上車嘅可以用700美元止賺繼續持有，至於下一個目標先睇返個740-750美元先。至於另一業績股微軟MSTF業績公布後，盤後回軟跌5%，之前有講過阻力喺495美元，早兩日係490美元都未見影，一個業績就落返454美元水平，咁支持位喺428美元，若然今日開市再回多啲，有440-445美元，可以考慮上車。
美元持續走軟，利好中港股市，港股昨日連升第六個交易日，並升至四年半高位。恒指高開198點後升幅擴大，收市升699點，以全日高位27826點收市，成交額增至3615億元，配合升勢。不過至夜期時段則見回吐，夜期及ADR回吐逾200點，今早大市低開。恒指今早低開199點，最多跌215點見27611半日低位後倒升，半日升148點，報收27975，成交額1719億不過不失。由於港股昨日已突破，並升穿去年10月高位，今早低開後，回吐壓力不大，恒指回試支持位即繼續向上。半日高位逼近28000大關，不過呢個心理關口，要破唔算難，但要企穩或者要時間，就好似早前上到27000後，一直未能企穩，畀少少時間再做整固，甚至做個後抽回測支持位，先調整再上更健康。目前大約27600，今朝試咗再做多個頂。但礙於RSI9已經到咗81，RSI14亦高見73，至於極短線RSI2更連續三個交易日高於95，今日已逼近100，去到呢啲位隨時可以做回調，咁嚟個小回調做埋後抽，最好試埋27400，再確認新升浪，呢一浪個目標可以去到29000-29200。
估計港股可維持強勢，不過今日為期指結算，港股或先於高位整固，加上短線已呈超買，呢啲位再追貨值博率唔高。恒指短線阻力約為28000-28200水平，短線支持為27600/27400。留意今日內房股喪升，傳部分房企毋須上報「三條紅線」，當代置業(01107)升61%；中國奧園(03883)升34%；融創中國(01918)升27%；龍光集團(03380)升29%；世茂集團(00813)升25%，反而一線嘅龍湖集團(00960)；華潤置地(01109)同中國海外(00688)等升幅最多都唔夠6%，似乎係愈唔掂嘅內房股升得愈多。老實講，就算撤回三條紅線，都唔代表內房可以成功去庫存，喺基本因素無變下，內房股仲係得個捱字，短線急升無乜意思，阿Man就唔會高追。反而今日想吼下華潤電力(00836)，17元作防守，目標19至20元， 6%以上嘅年息率兼穩定派息分紅，作為收息股係唔錯選擇。
原文網址：恒指先跌後揚 內房股集體飆升 | on.cc東網 | 產經 https://hk.on.cc/hk/bkn/cnt/finance/20260129/bkn-20260129092103125-0129_00842_001.html
Administrator
2026年1月29日