港股超買後步入回調整固
2月29日，大致多雲，有一兩陣雨及薄霧，吹和緩東至東北風。美股隔晚偏軟，投資者觀望今晚公布嘅1月份通脹數據，道指一度跌逾200點；但收市三大指數跌幅均收窄，道指跌23點；標指跟納指分別跌8點及87點；反映中概股表現嘅金龍指數跌1.6%。不過虛幣市場活躍，比特幣升破64000萬元，為兩年幾以嚟高位。不過港股喺ADR跌近百點，夜期亦跌70點，今早黑期亦跌逾百點，回落至16400水平。
今晚美國將公布PCE，估計跟CPI一樣，環比會出現較大升幅，相信市場已有足夠消化。目前市場已反映咗聯儲局將推遲至6月才減息，但年內減息3次至4次應該冇太大改變。此前，按揭銀行家協會披露，截至本月23日止的一周，房屋按揭按周下滑4.5%，係連續第五周報跌；美國30年期定息按揭利率降2基點，至7.04厘，於去年12月初以來最高水平徘徊。10年期美債息曾跌5基點，報4.265厘，對息口敏感嘅2年期美債息最多滑落7.1基點，報4.641厘。
近日流入美股資金放緩，即使科技股升勢升未夠全面，更多資金選擇減持龍頭改炒落後細價股，納指七雄開始轉弱，其中Google跌至2個半月以來新低，蘋果公司亦喺4個月低位徘徊。除咗AI板塊外，其他板塊盈利能力平平，美股的確存在泡沫，目前納指市盈率已達25倍，唔係要睇淡美股，只係目前美股平均回報率只有4%，跟10年債息4.27%相比，現水平值搏率一般，待回調再吸納。
港股跌入業績期，公布出嚟嘅業績有好有壞，中概股百度(09888)交出一份所謂超預期業績，業績公佈後盤前一度升3%，但開市後已低開4%，最終跌8%埋單。繼阿里(09988)後，成為另一業績後大插水嘅中概科網股，即管睇睇今日其股價喺港股能否守住紅底。港股經歷3年多熊市，唔少公司去年業績已見底，好多股價也跌至不合理低估值，有長線買入價值，主要睇今年業績會否出現反彈，反彈力度如何。雖然估值已跌至蔗渣水平，但短期未見有大量資金流入，現水平個別股票係值得配置長線投資，但要有心理準備坐上三兩年，但想透過炒賣搵錢，暫時仍未到時候，呢個係投資跟投機最大分別。
A股及港股升至本月高位後沽壓增加，上證昨日收市跌近2%，未能企穩3000水平，係近月最大跌幅。港股期指結算日反覆下跌，100日線16741得而復失，恒指收市跌253點，報收16536，成交金額增至1070億元。預恒指低開跌破10日線16462，牛證重貨區為16300-16500，此200點重牛區凶多吉少，未知殺重牛後能否作罷拗腰反彈。若動力減弱未如前兩日，則調整持續，回試50日線16180及20日線16107。今日初步支持16350左右，10周線16197及50日線，即16200支持力較大，即市反彈阻力為20周線16636及5日線16686。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。