【盤房來料】 港股或待期指結算後方有更明確方向(291026).docx

港股或待期指結算後方有更明確方向 美國中期選舉將於下周二舉行，儘管當地通脹較預期熾熱，但聯儲局昨日宣布維持利率不變，符合市場預期，當局稱累積更多資訊將有助當局制定適當政策立場，以確保通脹適時回到2%目標。議息結果出爐後，美股續升。美股周三好淡爭持，道指低開42點後，倒升最多256點，高見52634，沃爺發言後一度輕微倒跌，道指收市仍升97點或0.19%，報52475；標指曾上揚0.46%，收市升幅收窄至21點或0.28%，報收7744；納指最多倒跌0.24%。議息結果公布後，納指收市反彈72點或0.27%，報26549。 聯儲局於一連兩日會議後發聲明，提到美國經濟以強勁步伐擴張，雖然地緣政治局勢依然帶嚟高度不確定性，但本地開支強韌，生產力增長強勁，以及資本投資表現強健。美國職位升幅跟上就業人口的增長步伐，失業率變化不大。至於通脹持續高企，當局將致力穩定物價，以及維持銀行體系充足的儲備。投票取向上，FOMC以10對2票通過維持利率不變，當中有兩名委員投反對票，包括聯儲局理事Lisa Cook，以及克里夫蘭Beth Hammack，兩人均主張加息0.25厘。是次會議後未有發表利率及經濟預測，主席沃爺記者會上表示，就最新政策行動解畫，稱通脹仍過高，上月加息0.25厘後金融環境已收緊。同時表示聯儲局將減少政策委員會就利率進行投票會議次數，2027年及2028年分別只有7次及6次利率投票會議，另加分別1次及2次經濟議題會議、但唔會對聯邦基金利率進行投票，亦唔會發表政策聲明。 市場對FOMC嘅議息結果同沃爺做法唔太意外，股份個別發展。周三收市後Alphabet派成績表，股價收市升1.3%，明知盤後有業績，穩陣起見擺定個310止蝕，業績後股價巿係急跌近一成，跌穿300元，310當然自動死咗。同日放榜嘅MSFT跌0.1%，同樣有擺定止盤喺510止賺，穿50MA要走佬；不過業績公布好過預期，盤後股價回升近3%，盤後上到550，上返去52周高位，用返個528止賺，盤後最後就係529，穿埋走人先，495嘅短炒貨，唔想又一次錯失落車機會。南韓SK海力士ADR飆升13.3%，連帶MU都勁彈近6%，到晒阿Man嘅目標970-980，盤中先減返半976.6，另一半臨瞓放埋個968止賺，盤後又自動落咗車，穿返970條100MA，食先無壞，反而可以睇下今晚個900-910如何，擺咗個910撈半注。MRVL收購LITE有機會下周宣布，消息刺溂LITE盤後一度爆升至重返1000美元，不過阿Man本來係博上返920-950，但噚日已有一注喺868落咗車，806剩返一注，亂咁擺咗雙向盤，下面用860條100日線喺870左右，打算穿都食返五六十蚊走人，一面就放咗個1028，低過條KC線頂1038少少，就預上到呢度會頂住，本以為有排等，誰知瞓醒就唔見晒啲貨。LITE夜盤股價又落返950附近，20MA喺940，中午又排返個945，有冇接返半注先。被收購嘅LITE急升，收購者MRVL盤後急跌，由於MRVL條50MA已上移至244，20MA喺255，噚晚剛好喺呢個範圍之內，阿Man喺240上返車嘅貨，又怕議息後唔知乜料，決定擺返個245止賺，本來220條30周線做防守，唔穿又想撈一撈，就順手擺埋個220接返，竟然沽盤買盤都係盤後做晒。講到尾阿Man對MRVL係有情意結，尤其200至240呢啲範圍，有種忍唔住要上車嘅吸引力，另一個買盤擺200，10周線184做防守，斷估唔會隊到咁低嘅。DELL開市喺500樓上，擺返個500止賺半注，盤中就止賺咗半注，淨返450半注持有，450-460做防守。其他ALAB、NBIS同SPCX無郁過，防守位守到就繼續等反彈。META均價640嘅貨輸緊接近5%，但同樣守到600就等下先。 FOMC議息會議結束，美國10年期債息一度上揚6.2個基點，至5.048厘，息口敏感嘅2年期債息曾漲4.6個基點至4.7785厘，議息後倒跌逾4個基點，至4.695厘水平。美滙指數曾轉挫0.26%至102.05，日圓跌0.26%後靠穩。另外，加拿大央行一如預期加息0.25厘，基準利率上調至2.5厘，以降低能源價格上漲蔓延至更廣泛物價風險，並稱有需要再調高利率。加國央行預測當地通脹今年底將升至3.5%，明年第三季結束前仍高於3%，到2028年中逐步回落至2%；今年經濟料增長0.3%，高於原先估算，之後兩年平均增長2%。議息結果公布後，加元一度升0.46%至71.49美仙。有消息指美國及以色列據報準備喺美國中期選舉後向伊朗發動大規模攻擊，加上以色列大選結果未明，紐約期油抽升3%，每桶收報102.78美元，布蘭特期油漲1%，收報115.32美元。 港股昨日窄幅上落，好淡爭持，恒指高開42點後一度轉跌，但守住23000水平，收市報23094，升53點，成交1814億元，北水繼續錄得淨流出8.04億元交投仍淡靜，因晚上美聯儲局議息，市場態度較為審慎。夜期時段繼續窄幅上落，至議息結果出爐後，夜期曾波動，曾再逼近23000邊，但最終回升至23100水平左右收市，今早黑期亦於23100水平附近徘徊。至於今日港股期指結算，料上半場變化不大，今早恒指低開6點，報23088，早段最多曾升89點，高見23184，但23200影都無，A股插水港股又跟跌，早段恒指最多跌108點，一度失守兩萬三關口，低見22986，但23000假穿一下又上返，暫時大市喺23000-23200之間上落。恒指半日升11點或0.05%，報23106。估計今日餘下時間續於23100上下爭持，暫時23000為首個支持，跌穿下方支持22900，一旦失守，將再考驗上周低位22800甚至跌穿。至於上方23200為首個阻力，企穩23200下個阻力為23300-23400，企穩23400則有望向上回補23500-23600下跌裂口。睇個款，今日結算要待完成結算價，最快要三點半左右，港股先會再有方向，突破向上定向下，都係睇23000及23200呢兩個位。