港股短線反彈 乏外資參與仍死氣沉沉
12月29日，部份時間有陽光，天氣較為和暖。雖然假日氣氛濃厚，但道指再創新高，不過標指喺歷史高位前無法再突破，納指先升後回。2023年年結前美股靠穩，道指升53點，標指升1點，納指跌4點。大價股開始原地踏步，資金偏向炒二三線股份，但整體動力開始減弱，留意美股喺年結過後或出現調整。
Tesla預計全年交付182萬輛車，同比增37%，但低於預期200萬輛，亦低於早年預期每年增長50%。毛利率下降再成為市場焦點，由於中國市場競爭加劇，大行調低明年產銷預測，股價下跌3%，跌回250美元。Tesla短期看不到毛利率回升可能性，目前估值唔算平，股價喺200美元至250美元上落較為合理。留意Tesla係美股指標之一，佢唔行嘅話，美股亦行唔郁。
臨近年結，A股喺周三見有國家隊入場買內銀股，噚日A股就出現暴力式反彈，3大指數急升1.38%至3.85%。喺年關將至，唔排除阿爺喺2月過年前迎來一次大放水，問題係阿爺再放水，仲有冇人肯借，或者負擔得起再借，一如過去兩年玩法，今年地方專項債已有2萬億項目獲提前審批，即係到咗1月1日開始地方政府就可以到銀行提錢。為咗迎合整個放水計劃，11月中中央更特意增發行1萬億特別債，據悉已全數出售，呢1萬億特別款項，已存入各地方政府戶口。此外，上週四銀行為配合阿爺，特意下調0.1%利率，A股出現反彈亦合情合理。
至於港股，經過12月多隻大價股大洗太平地，包括阿里(09988)、美團(03690)、京東(09618)、騰訊(00700)、網易(09999)、藥明生物(02269)、港交所(00388)等多隻指數重磅股份瘋狂插水，好友信心徹底崩潰，連最後韭菜都被割。結果喺聖誕節假後就出現反彈，不過到今日恒指仍未企穩萬七水平，港股繼續有波幅，冇升幅嘅困局，愈趨A股化，對於外資基金嚟講，呢啲阿爺說了算嘅市場，都係避之則吉。缺乏外資參與嘅港股，變得死氣沉沉，即使短線有反彈，亦唔值得去追貨，指數炒上炒落還可以，中長線持有港股，只怕內地政策朝夕令改，坐咗貨都好難安心睡眠。
利益申報 : 筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。 免責聲明 : 本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。 版權聲明: 本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。