3月份新經濟股有波幅冇升幅
3月17日，天晴溫暖，日間炎熱，早晚有薄霧。美股隔晚個別發展，道指跌逾百點，標指亦跌6點，納指則升11點。市場焦點落喺今晚聯儲局公布議息結果。雖然估計聯儲局維持息率不變，但喺通脹升溫之際，幾時加息係市場最關注嘅重點，故當局發布嘅經濟預測「點陣圖」將會成為焦點。
不過市場一般預計聯儲局將持鴿派立場。美國10年債息仍高企於1.6厘水平，市場亦開始習慣及接受債息難以回復過往低水平，甚至已有預測指10年債息喺今年稍後時間將進一步升至1.8厘，甚至2厘，喺呢個情況下，對於高增長無疑較為不利，但呢一類股份經過一輪殺估值後，已漸於現水平搵到支持，只係難以回復1月至2月中猛烈升勢，目前需要時間整固，喺3月餘下時間，都只會係有波幅，冇升幅。值得留意係單日波幅已開始收窄，意味住調整已屆尾聲，只係目前需要搵一個支持點進行整固。
雖然較早前深度調整嘅高增長股開始收窄波幅，但風險仍然存在，隨住全球疫情受控，經濟逐步復甦，投資者應更關注企業嘅收益模式，除咗高增長之外，受惠經濟復甦嘅個別傳統股，已見資金流入，受惠內地政策嘅個別傳統股板塊，如基建、內需等股份，或需要在投資組合內增加比重，而唔係一面倒全倉持有科技股份。
環球經濟恢復增長，並唔係一條平坦大道，過程將取決於財政政策、公共衞生問題，以及消費者信心，而呢啲因素亦係導致今年波動升溫嘅主要風險因素。喺目前大環境下，除咗關注回報潛力之外，如何平衡風險係更值得關注嘅議題。任何時候都需好好控制注碼，避免係急跌時拋售優質股份，適度調整投資組合內不同板塊股份比重，多作短線操係，方能提高勝算。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。