港股下試3月低位機會甚大
9月8日，部份時間有陽光，間中有一兩陣驟雨，日間天氣炎熱。美股隔晚反彈，三大指數反彈，納指終止七連跌，隔晚彈逾2%，升246點；道指跟標指則分別升435點及71點。隔晚嘅反彈其實嚟遲咗，若非鮑爺一再放鷹，強調要加大馬力收水，而9月聯儲局議息將加息0.75%，令債息抽高至3.25%，拖延咗應該喺周二出現嘅超賣反彈。
業績期過後，市場暫時無乜消息，歐洲央行今晚議息，議息前歐洲股市隔晚亦見反彈，市場早已消化加息0.75%，不過議息後有乜嘢講先係重要，嚟緊加息路徑如何，面對高通脹但經濟下滑嘅慘況，歐央行加息再又死，唔加息仲死得更快。不過油價回落，兼且資源格價全面向下，對壓抑通脹有一定作用，要等歐央今晚議息睇下有乜嘢講。
不過通脹高企的而且確限制咗市場購買力，睇下美國人嘅消費情況就知，7月美國消費品進入下跌9.8%，創30年嚟最大跌幅，需求下跌連海運需求亦有所減少。早於上季古天后已提醒，下半年市場對海運需求料減少，航運價格將下行，航運股最風光日子已過，股價見頂回落，甚至有機會進入下跌周期。海運集裝箱貨運價出現大跌，從中國運去美國西岸的40呎FEU價跌至4800美元，運費較1月時高峰值大跌60%，其他地區海運價同樣較峰值下跌45%。不過咁，即使目前價格已較去年同期為低，但仍較疫情前高出三倍，對企業成本仍有一定壓力。
至於港股噚日失守萬九大關，即使A股反彈，港股亦未見跟隨，喺成交低迷下，即使大市現呈超賣，好友亦無力組織反彈。雖然尾市港股成功收復19000大關，但成交額只有861億元，仍未見有資金流入，嚟嚟去去錢得一注，外資參與買少見少，北水買貨亦唔積極，港股已呈陰乾之勢，睇嚟短期再下試3月低位機會甚大，都係暫時忍忍手，就算唔少股份估值已吸引，都只能分注小量買入，未宜過份進取。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。