小米業績表現出色 惟30元水平阻力不少
5月27日，天晴，間中有一兩陣驟雨，天氣酷熱。美股隔晚表現牛皮靠穩，三大指數只有納指升32點，道指跟標指幾乎持平無變動。不過一度係散戶抱團股又嚟玩突擊，挾食風氣重現。市場觀望周五公布嘅數據，對於通脹有否更大啟示，不過近日持續有聯儲局官員開腔，指通脹只係短期現象，更有分析指地緣政治風險因素，相對通脹對美股構成更大威脅。
至於港股隔晚ADR下跌，當中騰訊(00700)受壓，主要係內地監管機構下令騰訊分拆旗下金融相關業務，並組金融控股公司以便監管。古天后前日講過內地對科網股嘅一連串打壓，最終呢批巨無霸可能難逃拆骨命運。話口未完，一向以乖乖仔形象示人，並標榜主動節制金融業擴張步代嘅騰訊亦難逃此劫，步阿里(09988)旗下螞蟻集團後塵。
人民銀行去年底發表《金融控股公司監督管理試行辦法》，要求非金融類企業，要成立控股金融公司展開金融業務。雖然騰訊喺今年3月嘅全年業績記者會上已表示，成立金控子公司的影響是「中性」，只係公司組織架構上改變，但市場仍憂慮相關業務估值萎縮，阿里有辨你睇。純喺技術走勢方便睇，騰訊能否一直穩守50日線(約615)水平，以及一直穩守嘅250日線(575)將會係走勢好壞嘅關鍵。
科網巨企面臨拆骨及受反壟斷法所打壓，古天后已表現AMTX四大科技藍籌股之中，小米(01810)成為風險系數最低，相對最安全嘅股份，而小米噚日派成績表亦交足功課，交出一份遠勝預期嘅季度業績。小米呢份業績，市場何止收貨，直情係喜出望外，集團首季經調整淨利潤60.69億，不僅超過市場預期上限53億，更遠遠高於市場平均預期39億。反映喺全球疫情嚴峻及不穩定下，並未影響其銷售，公司線上銷售支持手機業務維持高增長。而市場對於另芯片短缺對公司影響嘅憂慮，公司表明現有原材料資源，仍然能夠令公司維持非常好增長。而有關電動車計劃嘅芯片亦唔關事，因為公司計劃兩年半至三年後先投產，預計當時芯片問題已可解決。
雖然印度疫情影響當地銷售，但市佔率未有下跌，估計歐洲增長可以抵銷到印度嗰邊嘅增長放緩。整體小米份業績相當出色，呢份業績亦絕對令公司PE拉低，目前估值一啲都唔貴，小米要重返30元水平應唔難。加上美國已將小米喺禁止交易名單上剔除，又重新被納入富時指數，唔排除再有外資從新建倉。只係今日股價若然裂口高開，又未能突破30元企穩，就唔好衝動追貨，尤其明日期指結算挾倉，未知結算後大市能否繼續向上，而待調整再吼位上車。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。