阿里健康睇30蚊唔過份
京東健康（6618）周二掛牌，股價狂升。集團為內地最大線上醫療健康平台及線上零售藥房，由龍頭電商京東（9618）分拆上市，業務跟阿里健康（241）相近。
阿里健康背靠強大電商母公司阿里巴巴（9988），喺線上銷售及營銷、技術及流量、支付及物流等方面各有優勢。雖然京東健康截至6月底止的活躍戶達7,250萬，較阿里健康線上自營店年度活躍消費戶6,500萬 （截至9月底止） 為高，但阿里健康全面運營嘅天貓醫藥平台，年度活躍消費者超過2.5億，後者接觸更廣更闊。
阿里健康已公佈截至9 月底止中期業績，期內收入增74%至71.6億元，毛利率改善至26%，半年度經調整後盈利達4.36億元，按年增2.9 倍。
京東健康跟阿里健康嘅估值，反映市場憧憬，市盈率以數百倍計，PE高到離晒地，不如用市銷率（PES）計算會覺得舒服啲。阿里健康現市值約3,363.35億港元，預測年度收入增至166 億元，現價預測PES 約20倍。京東健康以噚日收市價計，市值相當於3,508.58億元，預測本年度收入增至190 億元，預測PES 約18.4倍，京東咁睇平過阿里些少。
不過阿里旗下嘅支付寶已簽約超過3.5萬間醫療機構，相信可引流至阿里健康醫藥平台，進一步鞏固其市場領先地位。此外，阿里健康可藉阿里巴巴及天貓成熟電子商務平台嘅協同優勢，成為唔少大行喺呢個行業嘅首選股，應較京東健康享有更高溢價。若然京東健康股價持續向上，預期阿里健康亦跟隨，甚至獲估值重評調高，中線目標睇30元唔算過份，現價買入，跌穿22.5元止蝕。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。