【盤房來料】 高油價及平台股弱勢拖港股後腿(300425).docx

高油價及平台股弱勢拖港股後腿 受到國際油價及美國債息攀升影響，美股周三普遍受壓，道指高開21點後轉跌，聯儲局議息結果公布後跌幅曾擴至433點，低見48708，標指一度反覆回落0.43%，但收市與道指最終都收窄跌幅；納指最多跌0.53%，收市靠穩。美市收市，道指仍跌280點或0.57%，報48861；標指微跌0.04%，報7135；納指反而無乜事，微升9點或0.04%，報24673。值得留意係於今早亞洲時段，納指期貨(NQ)因為亞馬遜及Google盤後公布業績，股價回升，帶動納期再破頂。不過亞洲時段NQ高見27600水平破頂後，因油價又衝高，紐約期油逼近110美元，令NQ高位回落逾300點，重返27300水平之下。 美國聯儲局議息後宣布維持利率不變，符合市場預期，為今年連續第三次宣布維持利率不變。不過，有四名聯邦公開市場委員會(FOMC)成員投下反對票，為1992年10月以來，首次出現如此巨大政策分歧。理事Stephen Miran即係侵侵個老友，再次投下反對票，佢傾向於減息。克里夫蘭聯儲銀行總裁Beth Hammack、明尼阿波利斯聯儲銀行總裁Neel Kashkari，及達拉斯聯儲銀行總裁Lorie Logan都表示同意維持利率不變，但目前唔支持喺聲明中加入寬鬆傾向。至於鮑爺喺議息後表示，目前未有貨幣政策委員呼籲局方加息。當然侵侵一定呱呱嘈，話依家係減息好時機。家下幾乎都可以幾肯定，今年頭三季都無乜機會減息。 要數個股，最勁都係GOOGL，收市後公布業績，股價盤後升逾6%至370美元水平，年初有提過GOOGL係阿Man美股投資組合內核心股份，今年目標係380-400美元，當時股價大約係300-320美元左右，現價開始逼近目標價，3月底曾穿過300美元，但無加無減過，堅定持有，到380-400美元呢啲位，食半留半都係指定動作。至於另一核心持股NVDA破頂後，暫時喺短線支持區200-210美元徘徊，要整固下先。至於NBIS噚晚去過135邊，暫未回補163沽嘅一半貨，暫時持有住一半先，反而佢再穿135都要小心。TSM食半留半無變，暫未到理想回補位，等下先。ALAB回補後又上返190樓上，180同185元叫補咗個靚位，短炒有200-210又可以游一游水。CRWV守到100，108補返注短炒貨，收市上得返110企，又即管睇下彈唔彈到去118至120。不過RDW就穿咗9美元支持，頂唔順8.9一開市無耐走晒，再觀察下佢個8元至8.5美元支持如何，暫時唔撈貨住。至於另一業績股AMNZ，盤後都有2%升幅，同GOOGL畀就梗係削啲，AMNZ份業績合格嘅，但唔算驚豔，特別係因為投資咗Anthropic， AWS收入增長加速咗，而第二季度收入指引又比市場預期好，但資本開支太大，嚴重影響現金流，過去12個月自由現金流同比劇減95%至12.32 億美元。若然有貨嘅270樓上可以開始減返啲。至於NQ今早去到噚日預算嘅最後一個阻力，仲overshot咗去到27600，暫時見27000個支持形成咗，今晚都係睇住呢個支持位。NQ今晚好淡分水嶺27250，支持27150/27050/26950，阻力27350/27450/27550，基本同噚晚一樣。 港股昨日高開高走，恒指午後升幅一度擴大至453點，高見26132，收市升432點，報26111，成交收復100日線，不過成交額2582億元，未見成交增加配合升勢，未能做到價量齊升。目前市場幾乎可以肯定本季都唔會減息，至於聯儲局會否稍後收緊貨幣政策，則要視乎通脹數據再作調整。不過國際油價高企，紐約期油已逼近110美元水平，今早恒生指數低開103點，早段一度衝高見26072半日高位，但其後反覆向下，曾跌376點至25735低位，失守20日線。半日跌322點或1.23%，報25789；國企指數跌112點或1.27%，報8693；科技指數跌48點或0.97%，報4862。大市成交1565億元。高油價引發通脹與成本憂慮，令傳統類股份受壓，加上港股仍受平台股拖累，重磅科技股拖住港股後腿，暫時港股難有突破，再失守20日線即25800水平後，較大支持為25450-25500，即250日線水平不容再失。