【盤房來料】 科技股喘定內銀內需股捱沽(300626).docx

科技股喘定內銀內需股捱沽 美股周一止跌回穩，道指高開119點後，升幅擴大至最多435點，高見52311，標指一度回升1.23%，納指扭轉5日跌勢，美市收市，道指創新高報52182，升306點或0.59%；標指升86點或1.18%，報7440；納指升522點或2.07%，報25820。市場關注聯儲局主席沃什本周稍後喺歐洲央行年會的發言，可能對未來息口走向作出暗示。美國10年期債息曾升2.2個基點，至4.391厘，對息口較敏感嘅2年期債息漲3.1個基點，至4.119厘。美國里士滿聯儲銀行總裁巴爾金接受彭博訪問時警告，目前通脹太高，但有跡象顯示物價壓力或快將緩解。 Alphabet正式獲納入道指成份股行列，股價抽高4.8%，為漲幅最大道指成份股。SpaceX下月獲納入納指100指數成份股，股價反覆回升7.1%；同系Tesla升勁，回升8.5%。美股早段偏軟，有消息指美國消費者不滿記憶體價格急升，對三星、SK海力士、美光提出集體訴訟，指控三家公司以增產高頻寬記憶體(HBM)為藉口，來操控DRAM價格，對此要求賠償。見到呢單消息，都唔等1080個止盤，嗱嗱臨開市前1130落咗車先，等到開市又真係回到10MA同20MA，1040撈返貨，暫時有半注喺手炒住先，上面睇下個1180-1200係咪變阻力。NBIS早段穿咗250，守返紀律249止蝕，259嘅炒貨輸咗10蚊走人，誰知開市後即反彈，然後已沒然後，唯有睇定啲再算。MRVL守住240，見沽出咗NBIS，就252加多一注MRVL，連埋之前268撈咗嘅貨，短炒貨均價260，睇下今晚企唔企得穩條5日線，再組織一個升勢。DELL暫時算係咁，雖然盤中一度見379，但似乎又唔係太大沽壓，之前395撈嘅貨未走，對於DELL有少少情誼結，380撈多一注，用個370做防守，睇上唔上得返420企穩。INTC無郁過，雖然盤中喺條20MA即係120附近扭來去，但110個防守位影都無，表現幾硬淨，收市上返130樓上，個心都定返晒。KLAR企到20樓上，穩步慢慢上。 NQ噚晚早段曾低見29300水平，又係去返星期五個低位之前就反彈，一企好29400個分水嶺愈升愈有，連最後一個阻力29800都企埋，咁就上返30000樓上。納指似乎玩高咗一級，今晚個分水嶺30050，支持29950/29850/29750/29650-29600，阻力30150/30250/30350/30450-30500。 至於股昨日期指結算日，港股練成九陰真經(連續開出九枝陰燭)後，卒之反彈，恒指高開155點後，升勢持續，最多升511點，恒指收市升354點，報23026，成交額3153億元，則略嫌未能配合升勢。港股上周曾低見22518，距離較高位28056回落兩成嘅熊市定性水平僅差幾十點，加上22620水剛好為去年低位19260升至本年初高位28056黃金比0.618，若然港股仍處於牛市之中，此水平有一定支持，結果上周五收市亦重返22620之上收市，並開始展開反彈。以為今1日為半年結，喺粉飾櫥窗下港股可延續反彈，點知係自己諗多咗。恒指低開18點，報23007，早段曾倒升60點，高見23086，可惜23000大關得而復失，淡友未想收工，打穿二萬三後跌勢加劇，大市掉頭向下最多跌341點，低見22685。早市尾段跌幅略為收窄，恒指跌273點或1.19%，報22752。值得留意係今日科技股唔想差，半日科指升1.4%，ATMJ都已穩定咗，市場消息指百度(09888)旗下晶片業務崑崙芯計劃在港上市，百度ADR抽高7.6%，折合為港元較本港高5.2%，半日百度亦應近4%。至於恒指表現咁差，主要係內銀，內需股及石油股刻意被壓低，令指數表現咁疲弱。半年結連23000都收唔到，啲大戶淡友都幾狼死。 雖然今日港股半日表現比較差，但見科技股有改善，有機會今日壓住嚟做埋個場外結算，放完假返嚟，睇有冇幾會嚟個五窮六月後七翻身。港股如果喺上周五搵到短期底部，反彈之勢若能延續，首個反彈目標先企好5日線約23100水平，再上望100周線約23491及10日線約23686，100個月線23645，如能企穩23600-23700水平，則有望繼續向5周線約23860推進。企穩23800則有望延續反彈至20日線24337及進發。不過由5月高位回落至今所形成之下降軌，頂部目前大約為24400，除非大市能突破此下降軌，扭轉下跌趨勢，否則港股仍難改變一浪低於一浪向下尋底格局。相反，一旦本周再失守22600，大機會下破上周低位，咁七月份可能嚟個先低後彈，22600/22500再穿，要有心理準備個市落到21950-22000先識停。