【盤房來料】 港股逼近二萬六關又要抖抖氣(300726).docx

港股逼近二萬六關又要抖抖氣 國際油價近日大幅攀升、美國政府推出新一輪關稅措施，以及人工智能(AI)基建投資熱潮持續，均重燃市場對通脹升溫擔憂。而美國聯儲局於本港時間周四凌晨2時宣布，維持聯邦基金利率目標區間介乎3.5厘至3.75厘，即連續第五次會議按兵不動，符合市場預期。不過今次議息投票中，聯邦公開市場委員會(FOMC)成員以9票贊成對3票反對通過，3位地區聯儲銀行總裁投下反對票，因為佢哋主張加息0.25厘。因為議息關係，美股周四大幅波動，但普遍走軟，道指議息結果公布前，道指一度跌954點，議息結果出爐後，道指跌幅曾收窄至約500點，標指與納指更曾倒升；其後總統特朗普威脅將沉重打擊伊朗，加上債息向上，反映聯儲局選擇維持利率不變後、市場卻認為聯儲局喺應對通脹方面可能落後，拖累道指恢復跌勢，並擴大跌幅至接近1200點。道指收市仍跌1153點或2.19%，報收51594；標指及納指分別下滑1.52%及1.74%，報7316及24442；費城半導體指數持續下跌5.33%，半導體股續被拋售，報10447。至於美國10年期債息轉升9.5個基點，至4.699厘，30年期債息升穿5.2厘水平，是2007年以來首次，高見5.227厘，漲幅達到13.1%。美滙指數一度下滑0.65%至100.76。 阿Man短炒倉嘅空虛狀況持續，半導體股繼續捱沽，即使之前短炒MU贏過幾多錢都好，都未敢出手接飛刀，結果噚晚連5月線同20周線745-760呢一區都跌穿埋，盤後更一度低見705美元，睇見眼都突埋。雖然亞洲時段嘅美股夜盤有啲反彈，可惜彈到767又穿返745，咁搞法，760短線隨時又變成阻力，日線圖繼續醜怪，就算再睇好呢間公司，都要等股價跌定，橫行築底先再作打算。其他半導體股繼續插水，暫時都係食住花生先咪咁多手。至於短炒倉裡面嘅兩個生還者，MSFT同NVDA，NVDA就險守190，正正係50周線同250日線呢兩條線，由於阿Man有唔少免本嘅NVDA，短炒呢部份，會有較大嘅容錯率，個止蝕價都擺得遠啲去180。資金流入個別老登股，盤後見MSFT上咗420樓上，暫時企返多條移動平均線，尚欠條250日線即448呢個位未修復，388嘅短炒貨，繼續用個380做防守，或者係睇住400嚟止賺，再坐一會。納指走勢明顯轉弱，NQ噚日盤前一穿分水嶺27800，落到27400先識反彈，可惜至開市彈唔返上27800又再調頭向下結果逐個支持位打爆，去到27400穿埋直落27200先有得彈。依家又玩低咗一級，今晚個分水嶺喺27400，支持27300/27200/27100/27000，27000不容有失，至於反彈阻力27500/27600/27700/27800，睇下27800係咪慘到由支持變成阻力。 內存股插水，資金回流港股市場已一個月，昨日港股續升，高開176點，全日升497點，以接近全日高位收市報25807，連升三個交易日，成交額3122億元，按比例計，未算完全配合升幅，市寛則繼續背馳。至夜期時段，聯儲局議息維持息率不變，夜期於議息公布後扯高，升至25900水平收市，不過黑期時段升勢回順，黑期今早於25800水平徘徊。今早恒指順勢高開，一度逼近二萬六關，最多升163點見25971高位，但無以為繼，加上26000呢啲大位，邊有話咁輕易企得到，早段最多倒跌112點，見25695，但條250日線即25722似乎仲守到，暫時半日喺25800水平好淡爭持。 北水之前已連續第五個交易日錄得淨流出，累計流出金額逾150億元，但港股表現卻呈反向，可能跟牛熊證街貨最近1000點上下重貨區嚴重失衡有關。以昨日收市價計算，最近1000點牛熊證街貨比例為1:9，反映散戶主要睇淡，大量熊證街貨同時反映券商已因派發大量熊證進行對沖，累積大量淡倉，一旦今日熊證被強制回收，券商手上淡倉回收後將強制平倉，剛好提供一個機會給予期指好倉大戶於期指結算日，高位結算並進行轉倉。大大話話港股今個月初累計已升咗3000點，嚟到呢度抖吓氣亦好應該，今日期指結算日過後，睇下大戶再點部署。值得留意20日線正往上移，相當接近正下移之50日線，如大市保持高位，20日線短期內將升穿50日線，出現第二個黃金交叉，或有望扭轉港股中線跌勢，但能否重新建立一個升浪，則仍有待確定。短線恒指支持為25600-25700成交密集區，25600亦為10個月線25585附近，，下一支持為25300即5日線所在，重要支持為25100-25150，10日線所在。至於上方首個阻力為25950-26000，下一阻力為26200。