【盤房來料】 恒指成份股沽空比例高成挾淡誘因(300926).docx

恒指成份股沽空比例高成挾淡誘因 市場觀望美國今晚公布PCE及稍後公布就業數據，加上亦會有聯儲局官員發言，資金取態較審慎。不過美國30年期債息突破5.6厘，最多升6.25個基點至5.6091厘，創2002年以來新高，美股周二反覆偏軟，但至尾段跌幅收窄。道指低開64點後，跌幅擴大至最多352點，收市跌幅收窄至131點或0.26%，報51349。標指跌12點或0.17%，報7670；納指回吐22點或0.09%，報26797。 美國本周五公布9月份就業數據，不過債息等唔切已飛咗上去，美國10年期債息反覆升5.1個基點，報5.296厘，對息口較敏感嘅2年期債息則一度倒跌4.3個基點，至4.881厘。道明證券(TD Securities)策略員Prashant Newnaha認為，若中東衝突未有解決，定息收入市場將持續risk off，甚至可能波及股市。不過債市專家Bianco Research創辦人比安科則6年來首次轉為睇好美債，認為當前債息衝上20年新高係吸引入市位，亦係價值投資好機會。 雖然債息仍然高企，但美股噚晚又無乜太大鑊，股份個別發展，阿Man個短炒倉表現尚可，META兩注加埋平均價725，叫做企穩10MA722，收市升返3.2%，差啲上埋條5MA，所以就無減磅，繼續持有。MU死唔去，盤中仍守10MA，收市回升1%，盤後上到1070之上，收復埋5MA，不過今晚盤後公布業績，1048嘅短炒貨數量唔算多，阿Man想博一博，睇下單車變唔變摩托，上返1100樓上。相反，業績後震盪嘅話，1000邊想接多一注，用返個980做防守。DELL喺幾條平均線附近整固，550同535嘅短炒貨，暫時坐住先。MRVL真係阿Man嘅福將，噚晚彈返4.5%，218嘅短炒貨基本上可以坐定定。NBIS同INTC就以前者表現較佳，噚晚升返2%，219嘅短炒貨坐住先；INTC手上一注115嘅貨，等緊補裂口，打算100-105接多一注，用返個98做防守。GOOG跟MSFT就放埋一邊，短炒前者用320做防守，後者睇住490。CRWV近排多咗以溢價承接短期合約，有助進一步提升其毛利率，有見及此，喺86元接咗一注，但以估值嚟睇，CRWV呢啲價唔算平，但80左右會有一定防守力。至於AVAV果斷止蝕咗149，完全無後悔，暫時走勢都麻麻，市場唔buy呢個板塊。NQ今晚分水嶺30600，支持30500/30400/30300，阻力30700/30800/30900，暫時喺30100至31000之間上落。 港股經過周一反彈後，昨日又再回復跌勢，恒生指數高開6點見24648，已為全日高位，其後反覆下跌至24444低位，收市報24523，跌幅收窄至118點，成交額1846億元，北水於周五開始放假至下周四復市，昨日雖然未再錄得大量淨流出，但僅淨買入唔夠1.5億港元，觀望氣氛濃厚。雖然內地於收市後再宣布決定在全國範圍內實施居民購房貸款貼息政策，減輕新購買首套住房家庭的商業性個人住房貸款利息負擔。同時內地人行宣布，進一步調整完善幾項貨幣政策工具，以支持經濟發展。不過對港股並未帶嚟任何刺激，反而夜期進一步回落，再考驗上周低位，一度跌穿24300水平，ADR較昨日收市跌逾百點。今早恒指低開129點，報24393，跌幅一度擴大至190點，低見24332，不過中國公布9月製造業PMI重返擴張區間，大市跌勢逐步收歛，更曾倒升最多34點，高見24558。恒指半日收報24513點，跌10點或0.04%。假期前夕，預咗交投淡靜，大市半日成交887.66億元，不過北水半日淨流入41.36億元，收市再睇北水呢41億係咪留埋過假期。今日為月結及季結，但港股亦未似得會有任何粉飾櫥窗舉動，能保住24500水平已算萬幸。暫時外圍股市反彈，港股總算靠穩，不過要延續反彈，最低限度要企返條5MA，大約係24600水平，至於下方暫時24250條100周線仲守到。值得留意係過去幾個交易日，成份股嘅沽空比例都超過20%，一般人都認為沽空大，港股死梗，但阿Man觀察咁耐，每當成份股沽空超過20%，甚至超過25%，都會有一下短暫挾升，周五開始北水放假至下周四，若然恒指企得穩24550甚至24600，喺北水缺席期間，亦有機會短線挾一挾空軍。