【盤房來料】 眾多不確定性因素下少做少錯(310326).docx

眾多不確定性因素下少做少錯 雖然特朗普曾表示跟伊朗談判有良好進展，一度刺激美股噚晚早段高開，道指一度升逾400點，但實際上美伊談判未見有良好進展，隨著油價向上，道指曾倒跌109點，收市勉強回升49點或0.11%，報收45216；標指則跌25點或0.39%，報收6343；納指則跌153點或0.73%，報收20794。其實標指同納指都連跌咗三個交易日，亦跌到去近8個月低位。暫時中東戰事仍未結束，呢頭侵侵話同伊朗談判有進展，但嗰頭又口口聲聲凶對方，話霍爾木茲海峽未恢復通行，美方可能攻擊伊朗能源基礎設施。到今早又有美媒道侵侵喺霍爾木茲海峽未通行下，結束戰爭亦無問題。有關戰事消息不斷傳出，但油價似乎不為所動，目前紐約期指仍高居不下，處於100美元之上。似乎市場對油市反應麻麻，有分析指一旦原油供應持續緊張，紐約期指價格或會升至每桶150美元。市場對美股睇法分歧，部份投資者認為目前美伊雙方態度強硬，短期內衝突未有緩和跡象，如雙方措詞未有明顯轉變，情況將持續惡化。如能源供應陷入危機，或令分析師下調企業盈利，引發市場進一步下行。不過暫時投資者正減持過於集中倉位，而非大規模撤離轉持現金。另外，交易所買賣基金(ETF)資金流向亦顯示投資者保持觀望態度。雖然3月份多個類別資金流入較1月及2月疲弱，但並未見大規模資金流出。另有分析指美股拋售潮已接近尾聲，市場消化油價上漲預期，加上標指預期PE已較高位回落近兩成，市場即將好快發出見底訊號。 作為一般小投資者，面對目前眾多不確定因素下，手上投資組合能守住，維持較高比例現金，完全唔好做孖展，一毫子槓桿都唔用，一旦股市迎來更大衝擊，亦有足夠子彈去買貨。暫時阿Man就按兵不動，本來長線組合內股份都係好耐之前買落，暫時以守為攻，短炒嘅已止蝕咗先，情況未明朗，寧願少做少錯。至於NQ噚晚又做多個底，今朝因為有消息指侵侵願意停戰，個NQ由低位接近23000水平，一係彈到最高約23400水平。今晚納指個好淡分水嶺喺23200，支持23100/23000，以納指都開始超賣嚟講，應該個23000守得到，至於反彈方面，暫時阻力係23350-23400，23550-23600條5日線附近阻力更大。 至於港股喺中東戰火下，昨日期指結算日仍偏軟，恒指低開419點後，跌幅曾擴大至542點，低見24409，但其後有買盤吸納，跌幅收窄至201點，報收24750，成交額曾為2854億元，由於本周五開始一連5日復活節長假期，料成交額持續減少。高油價引發通脹憂慮，加上美匯指數重返100大關，對新興市場構成壓力，令整體投資氣氛變得審慎，加上長假期逼近，料市場積極性進一步向下，大市有機會繼續尋底。今早內地公布PMI指數，成功重返50之上，一度帶動恒指逼近二萬五大關。恒指高開67點後，升幅曾擴大至237點，見24988半日高位，但其後A股回軟，港股亦伴隨倒跌126點，見24624中午收市，而半日成交額只有1328億元，隨長假逼近，料成交趨愈淡靜。高油價引發通脹憂慮，加上美匯指數重返100大關，對新興市場構成壓力，令整體投資氣氛變得審慎，加上長假期逼近，料市場積極性進一步向下。暫時港股一直未重返250線即25100水平企穩，即使上周底部未有再跌穿，但易跌難升，唯有再觀望中東局勢發展，寧待不穩定性降低再重新入場。至於做淡嘅亦小心，一旦中東戰事有任何利好消息，或忽然挾升，持淡倉過夜風險亦大。