【盤房來料】 恒指於幾條移動平均線穿梭仍未見突破(310826).docx

恒指於幾條移動平均線穿梭仍未見突破 雖然美國與委內瑞拉達成協議，美方取得委內瑞拉超過650億桶已探明石油儲量多數控制權；但周日但美軍於周日襲擊伊朗位於霍爾木茲海峽附近拉臘克島(Larak)上兩處火箭發射基地，並持續加強對伊朗實施制裁，中東局勢再度緊張，油價仍然高企。與此同時，聯儲局主席沃爺喺Jackson Hole全球央行年會預備的發言稿中重申，堅決要實現將通脹拉回2%目標。沃爺講話後，市場認為聯儲局今年9月加息可能性升至50%以上，講話前概率只有約為三分之一；同時，交易員傾向押注到明年3月前加息兩次。聯儲局主席沃什發表鷹派言論，暗示可能要加息，30年期長債孳息由跌轉升2.5基點，曾漲至5.216厘；2年期債息急升12.2基點，高見4.354厘，顯示聯儲局短期內可能加息。美滙指數一度揚升0.57%至99.73，日圓跌穿160兌每美元關口，降0.51%。道指由升250點一度轉挫80點，收市仍跌9點，報收53559；標指回吐19點或0.25%，報收7711；納指跌138點或0.52%，報收26402。 NVDA雖然業績唔錯，但始終都無走出個range，去到230又掉頭，周五收市落返220樓下，阿Man短炒嘅貨無博業績，又唔係好蝕底。至於MU中咗個908買盤，周五晚一度高見946，可惜10MA及50MA又遇阻，收市落返932，今早見夜盤仲穿埋20MA，暫時都係range上落，值得留意係成交愈玩愈縮，決定另一個898買盤先取消，今晚企唔穩910，或者落車算數。至於MRVL中咗個220買盤，210買盤仍然有效，繼續用200做防守，呢個星期上唔返230企穩條50MA，同MU一樣，要考慮抖抖唔炒呢隻住。DELL個止賺位推咗上去450，夜盤搞掂落車先，企唔穩條20MA勢係假，今晚再觀察一下430條50MA行成點。CRWV放咗喺82嘅買盤末買到，日線行到神奇九轉第九轉，睇下晏啲夜盤或盤前中唔中，連埋上星期86接嘅貨，中到平均價84，80做防守，5%止蝕博佢行完個調整九轉，上返90樓上。暫時阿Man炒開嘅一堆AI產業鏈股份，動力一直減弱，沃爺啱啱又放咗隻鷹，都係謹慎少少好。NQ今晚分水嶺29400，支持29300/29200/29100，阻力29500/29500/29400。 美股業績期已近尾聲，市場焦點重新放喺息口走勢，9月FOMC恢復議息，留意沃爺先放定隻鷹，給予市場期望管理，即使9月底議息減息，由於市場早有心理準備，屆時市況又未必太差；相反，如息口維持不變，反而有利債息回落。留意本月公布嘅經濟數據，會否為未來息口走勢帶嚟更多訊息。 上周一阿里巴巴(09988)進行配股集資800億元，拖累恒指上周跌逾400點，不過整個星期喺期指周五結算前，受轉倉影響下，大部份時間僅於窄幅上落，周五恒生指數報收25584，按周恒指跌425點，失守10日線(25596)及20日線(25624)及250日線(25764)。雖然周線圖呈現「身懷六甲」的利好後市形態，美團(03690)上周五收市後亦交出一份超出市場預期業績，但因美軍再襲擊伊朗設施，今早大市低開。恒指低開164點或0.64%，報25420，跌幅擴大至最多294點，低見25290後回穩，未有進一步向下考驗100日線。半日恒指收報25402，跌182點或0.71%。大市半日成交1381.45億元，北水淨流入33.33億元。目前恒指於數條移動平均線之間穿梭，日線保歷加通道收窄，等候突破，通道上線在 26069，通道中線在 25624，通道下線在 25179，通道底部剛好與100日線(25233)相當接近，即25200為本周重要支持，一但確認跌穿，則向下考驗50日線即24814，跌破此關則確認恒指向下突破，料再考驗24500/24200/24000支持。至於反彈阻力方面，首個阻力為20日線及10日線匯聚區於25600，而250日線25750阻力更大。至於保力加通道頂部及26200一日未能突破企穩，保力加通道頂部重新打開，港股暫時仍然係有波幅，冇升幅，以牛熊證重貨區參考，好淡通殺。