5月港股難有起色唯有繼續打游擊
5月3日，多雲，間中有幾陣驟雨，間中吹強風，天氣唔算好熱。上周五美股回軟，科企業績參差，經濟數據反央通脹壓力升溫，令市場再度擔心聯儲局早收水，三大指數受壓。總結一星期，道指跟納指分別跌0.5%及0.39%，標指則升0.0.2%。至於港股當晚ADR及夜期均見下跌，夜期更跌穿28500水平。踏入五窮月，港股何去何從，係咪一如市場傳統智慧咁講，五窮六絕，要sell in May?
過去十年，恒指5月份跌市機會達八成，係最年大市下跌機會最高嘅月份，不過去年更因為疫情關係，股市跌至22500水平，只係股民數字更因為WFH措施而節節上升，有資金喺該水平收集，慢慢向好，當中新經濟股更有資金追捧而展開升浪。不過今年就唔多樂觀，上個月大市維持反覆上落，但波幅收窄至只有千鬆啲點，唔少公司更進行配股集資，又或者大股東減持套現，大市成交額明顯萎縮。4月份港股表現牛皮，而外圍疫情轉差或拖累港股表現，一旦恒指再失守28000點水平，支持位或下移千點至27000水平，投資者未宜進取，甚至要趁升市日再減磅。
睇返美股嗰邊，業績期完結後，預期市場焦點再重投國債孳息上落，雖然早前10年期美國國債孳息已回落至1.6厘，但短期仍有機會因通脹升溫而抽升，幸而美國持續放水，美股反而高位徘徊，留意債息變動，一旦抽升將令美股顯著回吐。另一左右港股關係為A股表現，內地未見再有刺激經濟措舉，銀根亦未見再度放鬆，反而通脹升溫下，貨幣政策傾向較緊，華融債務危機備受關注，缸邊友要留意內地企債問題會否持續發酵。由於北水係支撐港股重要動力，北水唔開大水候喉掃港股，港股都係呆呆滯滯。估計5月份缸邊友都要繼續打游擊，以短線操作為主，即使五窮月未算太窮，亦不宜進取。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。