【盤房來料】 港股反彈至50日線前遇阻(150726).docx

港股反彈至50日線前遇阻 美國公布CPI，6月份通脹升3.5%，放緩速度快過預期，緩解聯儲局加息壓力，美股周二回穩，當中以科技股反彈較明顯，除咗IBM因為銷售遜預期，股價狂插兩成有突，收市跌25.2%，係至少1968年以來單日最傷，市值蒸發690億美元，成為表現最差道指成份股，拖累道指裂口低開452點。不過，道指喺銀行股帶動下，倒升最多196點，高見52695，收市道指反覆僅升9點，報52508；標指升28點或0.38%，報7543；納指升322點或0.9%，報26107。 首先講下南方海力士兩倍槓桿ETF(07709)，噚日阿Man提到經過一輪去槓桿後，噚日60樓下啲位可以博返二三十蚊反彈，用個48個防守，結果今日一嘢彈到80第一個目標。有博反彈嘅，手上有貨可以keep住先，只要唔穿返72條100MA，純技術走勢睇，可以進一步上去補裂口，上埋個89-90，補得到個裂口唔返轉頭，企埋條10MA，即係三個交易日就補晒個下跌裂口，呢一輪斬倉急跌告一段落，或者有得再拾級而上。其實以現價嚟計，海力士又真係唔算高估值，單位數嘅PE高得去邊，只係之前啲ETF太多韓仔槓桿再槓桿，一個震盪穿咗啲補倉位同斬倉位，價格就急瀉，依家估值又回歸正常，甚至算係平，自然會有個反彈上返去。不過搞咗兩倍槓桿嘅7709，海力士嘅ADR咁高溢價，有心買貨不如直情去買韓股隻海力士。海力士翻生，有見及此，阿Man手上908上返車嘅MU牢牢抱緊，等下有冇1000樓上，若然成功衝破返1020至1050嘅阻力，喺返所有平均線上面行，又可以望返之前啲高位。DELL繼續持貨，短炒嘅可以將止賺位推高至430-440。META卒之收市上到250MA，企唔企仍有待觀察，仲有貨就keep住先。MFST仲係發緊吽逗，資金似乎無入場。INTC喺105上返車，睇返日線圖，技術指標出咗個下跌神奇九轉，已經行到第九轉，睇係咪開始到支持位反彈。NVDA貨底當然長存，短炒仲有一注貨，以估值嚟講，又真係唔貴，樂意再坐一會。NQ又上返30000，繼續高位震盪整固。今晚個分水嶺係29800，上面企穩30000，阻力係30100/30200，穿29800，下方支持先睇29700/29600。 至於港股昨日先跌後回升，早段恒生指數低開32點後，一度跌311點至23902低位，但午後拗腰倒升，一度升222點見24436高位，收市升幅收窄至127點，報24340，成交額3129億元，北水持續流入。至夜期時段，美國公布CPI數據較預期溫和，市場對加息憂慮降溫，夜期一度升至24600水平，其後回順至24400水平，今早黑期亦於24400水平徘徊。美國通脹放緩速度快過預期，紓緩聯儲局加息壓力，美股隔晚靠穩。港股上日升127點後，今日高開高走， 恒指高開210點，報24551點，其後略為回調至半日低位24449，內地公布上半年GDP按年增長4.7%，次季GDP增長4.3%，創三年半低位，但反而好友隨即發動攻勢，大市升幅逐步擴大至最多升434點，高見24774，但喺其後升勢回順，未能一口氣突破50日線約24815。恒指半日收報24695點，升354點或1.46%。國指升94點或1.16%，報8197點；科指升64點或1.39%，報4744點。大市半日成交1747.8億元，北水淨流入93.84億元。北水已持續錄得淨流入成個禮拜。 雖然港股升至24000水平後，動力有所減弱，但恒指已超過三個交易站穩於20日線(23711)水平，5日線(24191)亦已升穿10日線(23735)及20日線，發出短線黃金交叉訊號，暫時形態上仍利好，料短線向上挑戰50日線(24815)機會甚大，目前日線保力加通道頂部約24859亦接近50日線，估計24800-25000有一定阻力，反彈至該水平後，有機會進行整固，甚至回測支持位，屆時首個支持將會上移至10個月線約24300水平。目前下方首個支持為24150-24200，亦為5日線及30日線所在，下一支持為24000心理口，下一重要支持為23700-23800亦為10日及20日線所在。港股要延續見底回升勢頭，23700關不容再失。