恒科指築底回升向50日線推進
5月21日，天氣酷熱，但局部地區有幾陣驟雨，日間部份時間有陽光。聯儲局會議紀錄暗示可能收緊貨幣政策，幾個官員早前已表示未來幾次會議，可能會討論到幾時減少QE，不過市場對經濟持續復甦保持樂觀情緒，蓋過對未來聯儲局收水嘅恐懼。事實上，美國經濟遠未達到委員會的最大程度就業及價格穩定目標，討論歸討論，目前距離實際收水時間似乎仍遠。美股隔晚做好，三大指數上升，納指更升逾200點。
日前虛擬貨幣急挫，比特幣一度急挫逾三成並失守3萬美元大關，雖然重量級投資者出嚟護航，令跌幅收窄並重上4萬美元大關，但預期短期大上大落波動情況持續。之前唔少缸邊友都擔心幣淡或拖累股市表現，事實係虛幣市場熱潮減退，或引流部份資金回流股票市場，反對股市重現生氣。
比特幣自去年9月以嚟瘋狂炒高超過5倍，雖未致於去到全民皆幣嘅狀況，但泡沫白熱化係不爭事實。近日阿爺一聲令下，禁止金融機構及支付機構開展虛擬貨幣業務，內蒙古更全面清理關停虛幣「挖礦」項目，消息整個虛幣市場翻天覆地，仆到一仆一碌。阿爺喺虛幣市場火熱之際，一盤冷水照頭淋其實並唔係壞事，適逢早前TESLA已表示唔接受比特幣作為其產品交易單位，已反映虛幣用作交易貨幣最簡單用途亦未能做得到，虛幣實際用途需要再作定位，令瘋狂追捧嘅資金冷靜落嚟。如今中國率先出手整頓幣市，有肋虛幣炒風失控，最終禍延至整個金融體系，同時為數碼人民幣鋪路。與此同時，大宗商品期貨愈炒愈烈，令通脹預期急速升溫，打擊炒幣風氣有助讓整體資本市場槓桿降溫，大宗商品市場亦見價格回落，對阿爺嚟講係一舉數得。
騰訊(00700) 股價及相關新聞 噚日派成績表，雖然首季盈利增長逾六成，但都係由投資公司估值增加帶嚟嘅成果，但撇除該等影響後的核心盈利增速按年放緩7個百分點，為2019年次季之後最慢。而今年各重磅巨企均大灑金錢用作投資，科網行業明顯已進入新一輪投資期。騰訊亦唔執輸，利潤增量用於投資，意味着未來3季的non-IFRS盈利嘅按年增長，理論上唔會高於首季，即介乎於零至22%。不過市場似乎唔欣賞呢啲放眼將來嘅舉動，隔晚騰訊喺ADR更一度跌穿600元大關，不過科網股近日漸見回穩，恒科指於上周已於7500水平做咗兩隻腳，或已成功尋底，事實上唔少科網股亦逐步築底回升，目前只欠成交配合，一旦成交回升加強動力，恒科指重上8000大關後，可望向住8200水平50日線逐步向上推進。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。