指數進行整固 50日線不容有失
11月21日，大致多雲，間中有有兩陣驟雨。上周五美股三大指數保持上升，一如所料，當標指跟納指分別下試3900及11000支持位，成功守位後即見回升，畢竟美股自上月低位反彈幅度有返咁上下，目前喺高位消化亦屬合理，但仍未可確定已擺脫熊市，標指要重返4100水平，並企穩先有條件由熊入牛。不過美股波幅已漸漸收窄，VIX回落至23水平，當恐慌指數低於28，市場嘅恐慌情緒就會減退，當VIX進一步回落至25水平，甚至低於23水平，美股就會反覆向好。但反映科技股投資情緒嘅VXN只係回落至29.25，即係科技股仍有一定沽壓，走勢仍未明朗。
決定美股後市方向仍然係息率走勢，2年跟10年息差已擴闊至0.7%，市場開始憧憬明年下半年有條件減息，不過要決定息率走勢，仍然係睇通脹，債息回落美股反彈，美股向上炒又有機會推高通脹，可以肯定係聯儲局要做好情緒管理，所以有官員出嚟放鷹出下口術，防止美股過熱導致通脹反彈，亦係合理做法。
雖然美股上周五保持反彈，但中概股表現卻未如理想，京東(09618)公布第3季業績出色，收入增長11%，Non-GAAP利潤同比增98%，環比增%，遠勝阿里(09988)，刺激ADR盤前曾升5%，但開市時只升1%，其後一度倒跌4%，最後仍跌2.52%收市。京東好消息出貨，中概股都跟住回落，主要係之前空軍大手淡倉，唔少都已平倉，回補空倉壓力大減位，再追貨嘅資金就相對減少。
港股由上月低位14600水平反彈，至上周最高18400水平，反彈幅度已達三成，呢個反彈幅度甚至超越美股，嚟到現水平開始步入整固期亦合理。暫時日均成交額保持喺1200億以上，遠比之前不足1000億嘅成交額理想，雖然追貨資金減少，而現水平亦見部份短炒抄底資金減磅食糊，港股有冇本事再上去，要睇17000至17200頂唔頂得住，50日線目前喺17114點左右，只要條50日線仲守得穩，10日線又已升破50日線，後市仍有條件進一步挑戰100日線，大約係18800至19000水平。上周已見資金喺不同板塊之間流動，呢段時間指數整固，或進入炒股唔炒市嘅狀況。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。