港股下一步要挑戰50日線
11月11日，早上時間多雲，日間大致天晴。隔晚美股急升，道指升1201點；標指升逾半成，納指更勁升7.35%。美股勁升原因係因為公布10月CPI降速較預期大，加上早前幾日美股回調，令之前超買情兄得到改善，加上通常美股喺中期大選過後，情況變得明朗化，美股其後嘅升幅可以去到一成過外，如今通脹有望見望，美股之後嘅上升之路或會變得較為易行。目前標指已升穿3900阻力，下一阻力喺4100點，至於納指亦升穿11000點，下一阻力係11300點。
美10債息回落至3.8%，一旦CPI降速繼續加快，當通脹穩定，明年就有減息空間，以聯儲局嘅準則，只要息口高過通脹2%，而通脹穩定唔惡化，咁美息就有條件向下，呢個亦係10年債息喺10月份CPI公布後，回落至3.8%嘅主要原因。雖然近日美企大手裁員，但未出現倒閉潮，甚至唔少企業仍錄得盈利，只係盈利有所下跌，或調低來年盈利預測，情況好過歐洲好多，以基本面嚟講，美股係有上升條件。尤其喺大企業相繼裁員下，就業市場未見明顯收縮，反而有所擴張，失業率一直維持喺低水平，雖然高估值嘅科技股被狂殺估值，但當大部份高估值股份，已較高位回落七成或以上，個別優質股份，已屆吸引及可收集水平。
對於美股，古天后係較為睇好，不過當美息見頂回落，美元回落，資金開始重返新興市場，令中港股市由低位回升，之前提到港股由14600低位反彈逾2000點至16800水平，早兩日再度回落至接近16000水平，雖然噚日萬六關一度失守，但20日線仍企定定，都講過只要20日線守得住，整個反彈浪未完結，仍有條件挑戰17000/17500，甚至18000水平。今日預期喺美股急升下，港股將出現裂口上升，只要16800企得住，而又有成交配合，下星期港股就有條件挑戰50日線。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。