港股能否收復50日線為後市關鍵
10月18日，部份時間有陽光，天氣乾燥，早上氣溫清涼。呢幾日氣溫明顯轉涼，係時候添多件衫，著返厚少少喇。美股上周五繼續做好，三大指數上升，而港股ADR及夜期亦受帶動做好，恒指喺新加坡黑期高水逾百點。睇返恒指熊證重貨區喺25500至25600呢個水平，估計指數挾高殺熊機會甚大，只係殺完熊證重貨區之後，港股能否企穩喺50日線(25423)，係後市能否更上一層樓嘅關鍵。
港股連續三個星期做好，恒指累計升咗1138點，純睇技術走勢，恒指已突破下降軌，不過目前情況跟上個月一樣，50日線仍有一定阻力，恒指要企穩50日線之上，港股方能扭轉之前弱勢。而上周港股升勢除咗由重磅科技股帶動外，大笨象(00005)亦功不可沒。大笨象升勢主要由外圍金融股做好帶動，美國金融股普遍交出亮麗成績表。不過美國嘅金融股業績做好，主要由投行業務及資本市場業務帶動，呢方面都唔係大笨象強項，大笨象嘅業績未必跟得上國際金融機構嘅業績，炒作大笨象嘅缸邊友都係要小心，始終大笨象升到46至48水平，值博率已大減，尤其48元水平阻力其大，更莫講話要重返50元水平。
除咗科技股回勇之外，上周又見新能源板塊有資金流入，面對內地限產限電政策延續，以及國外能源價格高企，導致部分原材料減產，以及美國實施基建投資計劃，幾大因素可能引起工業品價格持續波動。預計內地政策仍集中推行穩健貨幣政策，以及產業升級轉型。策略上，重點關注新能源產業鏈包括光伏、風電、新能源汽車等。
資金繼續睇淡內地房產產業鏈，恒大(03333)事件仍未解決，阿爺開到口話恒大輸出風險可防可控，潛台詞係阿爺唔會出手救恒大，而呢間有咁上下份量嘅內房民企，亦唔係屬於大到不能倒。雖然阿爺鼓勵央企國企收購恒大資產，助其套現渡過難關，不過恒大嘅財政問題令買家卻步，有消息指越秀地產(00123)已取消收購灣仔恒大中心計劃，原因係恒大嘅財政問題複雜，買家擔心交易未能順利完成。
恒大問題一日未解決，都會困擾住整個內房板塊，而其他內房企業違約之聲不斷，啱啱再有傳出違約嘅寶能集團，跟恒大有少少相似，都係業務百足咁多爪嘅綜合企業，同樣係以高槓桿模式發展業務，並累積龐大還債壓力，短期債務壓力接近200億人仔，而總負債超過5000億人仔，資產負債比率接近90%。
大部份高負債內企表面睇都係負債比率超高，但仍未到資不抵債嘅地步，但心水清者，一旦企業要賣資產套現還債，賣價並未如本來估值般理想，分分鐘要賤賣資產，咁若然資產負債比率超過八成，資產賤賣打返個八折，分分鐘真係賣完資產得個桔，其至資不抵債，難怪資金對於內房呢個板塊仍然避之則吉。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。