11月7日，大致多雲，間中有一兩陣微雨，日間短暫時間有陽光。市場繼續炒減息，不過美債急回後略見小反彈，限制美股升勢，美股僅靠穩微升，道指升34點；標指及納指分別升7點及40點。VIX進一步回落至15水平之下，標指反彈逼近4400關需要整固，雖然10年債息有所回落，但仍高企於4.6%，相對納指PE高達26倍，回報率不足4%之下，實在好難吸引資金高追，只會等待回吐吸納，要待10年債息回落至4%水平後，美股方有動力向上。
由於美息似已見頂，美元吸引力同時下降，美匯回試105開始轉向，新興市場吸引力亦回升。繼阿爺頻頻出招救市後，輪到南韓政府全力為股市護航，嚴禁股票沽空，代表淡友已無法再加碼沽空，一旦被挾淡倉，淡友亦無法還擊。咁嘅情況下，淡友多數選擇離場，唔會繼續打一場對自己毫無益處嘅敗仗，加上之前淡友都贏咗咁多個回合，平倉計數離場亦已立不敗之地。呢個情況下，南韓綜合指數噚日大升5.6%，亦帶動亞太區股市氣氛，A股做好，3大指數分別升0.91%至3.26%不等，A股明顯有資金入場，成交回升至1.06萬億，係近期少見嘅過萬億成交，後市走向主要係由平淡倉所帶動，至於再有無資金追入，係決定後市表現嘅主要因素。
至於港股，噚日回升至18000水平，短短4個交易月間反彈1000點或5.8%，週一成交增至1151億，雖然高位獲利盤增加，但資金高位接貨力度唔弱，反彈能否持續落去，要睇呢個星期，仲有幾多新資金願意進場接貨。目前港股仍然喺低位，以估值計算係相當吸引，若然未來幾日成交應能保持過1000億，反彈可持續。不過成交再度縮水，未能維持1000億嘅話，即係未有太多新錢入場，繼續塘水滾塘魚。
大市成交雖增加，但北水只淨買入8.35億，說明北水態度，似乎係傾向留喺主戰場A股，主要係人民幣相對仍便宜，A股大把平貨執。事實上，恒指由7月開始向下，都係喺成交低迷下陰乾，市場內資金面薄弱，大戶炒家將指數舞高弄低，搵散戶割韭菜搵食自己。幸而噚日大市上升，買盤比較全面，唔少個股都見買盤，而且部份板塊走勢已有改善，11月及12月港股走勢仍然較樂觀。
恒指噚日一度重上18000，最終收市未能企穩，收報17966點，升穿一直以嚟50日線，過千億元成交配合。但夜期已見回今日回吐，首個支持為50日線17785，而上周五高位17751同為支持，回吐需守17700-750， 若能企穩本周仍會挑戰上月高位18392及100日線18443，即18400-500水平。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。