周末前夕悶局難破 大市暫於50日線上整固
雖然鮑爺一度收歛少少佢嘅鷹派回吻，令美股早兩日回升，但多名聯儲局官員都預咗3月就可能加息，更有官員指今年內加息4次，拖累美股隔晚三大指數全線下跌低收，而科技股跌勢更較為顯著，納指跌2.5%，嗰邊啲中概股又插水，反映中概股表現的金龍中國指數急跌4.7%，創三星期以嚟最大跌幅。唔單止美股下跌，就連內地股市亦腳軟，港股受兩面夾擊，加上恒指兩日升近700點後，今早回吐。
恒指低開243點，跌幅曾擴大至288點，見半日低位24140，其後跌幅收窄至116點，見24313點半日高位。中午恒指又重返24200水平之下，半日跌250點，報24179；國指則跌127點，報8475；恒科指跌105點或1.8%，報收5690，跑輸大市。
藍籌股個別發展，加息步伐加快，大笨象(00005)如虎添翼，半日再升1.5%，股價升至兩年高位，今個星期更順利修復250周線，只要守得穩，有條件進一步挑戰55-60元，但留意60元阻力都唔嘢少。友邦(01299)跟恒生(00011)半日亦升逾1%，但內銀跟內險股就回吐。美國嘅科技股受壓，香港呢邊嘅科網股又點可以獨善其身，加上早兩日勁彈見超買，呢兩日回吐亦好正常。ATMJX全線下跌，之前彈得勁嘅美團(03690)跟京東(09618)齊齊跌逾4%，美團又重返220樓下，反而京東仲守得住280，睇嚟呢個位有不俗支持。騰訊(00700)、阿里(09988)跟小米(01810)，半日分別跌2%、3.7%及1.5%；其他科網股全線下跌除咗快手(01024)半日逆市升2.8%。
醫藥股整體表現唔錯，但以較傳統嘅藥股表現較佳，石藥(01093)半日升4%，係表現最好藍籌股，中生製藥(01177)半日亦升2.2%，生化藥股升勢無咁強勁，唯獨君實生物(01877)半日升7%，一口氣修復多條移動平均線，表現較為突出。內地上月人民幣計出口增長達17.3%，航運股無視波羅的海乾散貨指數連跌第五日，普遍向上，只有對該指數敏感度較高嘅太平洋航運(02343)半日跌0.6%。
話咁快又到星期五，近幾個月到咗星期五，個市都傾向較悶同較靜，主要係缺邊友唔想承擔周末風險，睇嚟下半場大市都係繼續發呆，可以提早熄機。既然無得出街晚市堂食，不如早少少收工買餸，返屋企煮飯仔。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。