港股回試50及100日線暫見支持
美企裁員大增及職位空缺急降，科技股跌勢未止，美股周四三大指數全線向下，道指低開188點後，跌幅最多擴大至672點，道指收市跌592點或1.2%，報48908；標指跌84點或1.23%，報6798；納指跌363或1.59%，報22540。市場避險情緒高漲，個VIX上到20樓上，美股跌係正常。只不過跌得最勁嘅加密貨幣，BTC喺一度跌至逼近6萬美元大關，暫時彈返去64000左右，已經將由舊年11月特朗普當選美國總統時嘅升幅全數蒸發。由於7萬美元係一個重要支持位，跌穿咗呢個位，有機會7萬變成反彈阻力。其實BTC到今時今日都仲未成為流通貨幣，一直只係炒作為主，真正價值好難計算。難聽啲講，加密貨幣更加係不法份子用嚟清洗黑錢嘅工具之一，一旦受不同國家加強監管，跌起上嚟真係可以無譜，博反彈嘅就要睇緊啲止蝕位，再穿6萬嘅話要小心。
因為BTC唔少人炒爆倉，連帶拖累埋本來估值唔平嘅美股科技股被拋售，美股嘅科技股愈走愈弱，暫時似乎係蘋果叫最頂得吓。其實發展AI要投入大量資金都係已知事實，但之前市場氣氛太好，加上流動性充裕，只要一沾上AI嘅股份就炒到出煙，依家回歸理性，大家計一計數，見投入資金後，收入不似預期，甚至未有咁快體現收入，risk off之下就先沽出呢批高估值股份。噚晚NQ繼續插水，其實跟住個分水嶺去定向都無乜點錯，只係無諗到連最大一個支持位24700條30周線咁不堪一擊，開市後跌穿呢個位就倒水，竟然直踩到去條10個月線即24250-24300水平先識反彈。似乎NQ個移動區間要再下移一級，落到去24200-25500，唔上返25500，NQ可以話弱過藥煲。今晚NQ個分水嶺為24400，支持係24300/24200，overshot見埋24000都唔出奇；至於反彈阻力為24500/24600，而24700為前重要支持，跌穿咗可以變成初步阻力。個股MU盤後真係有上車位365-368美元，買盤中咗見彈返到373美元左右，留意博短炒380-400阻力可以食下糊。
至於港股昨日反覆，午後拗腰倒升37點，報收26885，重返20日線附近收市。但至夜期時段因美股顯著下跌，港股亦受拖累，跌至26500水平。今早於黑期時段繼續下跌，更跌穿26500水平。恒生指數低開530點於26354點後，曾挫590點，低見26295，接近50日線及100日線見支持，其後跌幅收窄，半日跌304點或1.13%，報26580；國企指數跌47點或0.52%，報9045；科技指數跌25點或0.47%，報5380。半日成交1394億元。今早大市低開即考驗50日及100日線即反彈，主要係短線嚴重超賣，噚日都提到個RSI 2跌穿咗10多數會彈一彈，既然試咗兩條移動平均線試咗反彈，即管睇下半場彈到幾多，反彈暫時阻力係26700/26800，而條20日線上移至26900左右，亦係上升軌底部26950所在。呢啲位都會成為反彈阻力，個市雖然超買，但反彈仍要過五關斬六將。短線大市要扭轉目前調整跌勢，首先要企穩20日線同上返條上升軌底，要確認調整完成再回復升勢，條件係要解除島型頂威脅，即係要回補整個下跌裂口，重上27400水平，個市先叫可扭轉跌勢。
原文網址：恒指偏軟 金融股向下 車股高走 | on.cc東網 | 產經 https://hk.on.cc/hk/bkn/cnt/finance/20260206/bkn-20260206092021300-0206_00842_001.html
Administrator
2026年2月9日