港股本周考驗50及250日線機會大
2月20日，天氣回暖，氣溫回升至20度以上，部份時間有陽光，天氣乾燥。上周五美股繼續反覆，道指一度跌逾百點，最後倒升129點收市，但標指失守4100水平仍未收復，下一重要支持為3900水平，納指續跌，但暫時未見美股有大跌可能，都係日升日跌嘅反覆走勢，今晚美股假期休市。
美股上周開始走弱，主要係經濟數據不及預期，之前市場憧憬FOMC年內可轉軚減息，但反映通脹嘅數據仍然強勁，暫時減息無望。愈來愈多人估計3月份議息可能加息0.5%，不過古天后估計加息0.25%嘅機會大啲，主要係美國經濟仍要穩定復甦，雖然就業市場表現穩定，通脹雖仍高企但已見頂，FOMC亦無需要繼續進取加息。就算聯儲局官員放鷹，都係防止市場氣氛太熾熱，免得見頂中嘅通脹再回升，FOMC出出口術冷卻市場情緒，多於真正有大幅加息需要。
FOMC官員最近放鷹撥冷水，應該係近日愈來愈多散戶資金入場，喺過去一個月，美股散戶每日淨流入買貨金額，高達15億美元，係有紀錄以嚟嘅高水平。除咗散戶積極買貨，上一季美股沽空金額驚人，當股市從低位回升，引發大量空倉回補，單係2月份上半場，科技股回補嘅沽空金額，規模係過去10年第二大，主要係市場氣氛逆轉，尤其對AI概念股情緒高漲，空倉不得不回補。但空倉完成回補後，美股動力開始減弱。再加上對AI概念股過份憧憬，而ChatGPT可靠性開始被質疑，美股近日嘅氣氛開始冷卻，令美股進入日升日跌局面。
至於港股調整則持續，雖然上周兩度回落至20800水平反彈，可惜10日線喺上周四即日得而復失，暫時10日線由支持變為阻力，受制10日及20日線嘅情況下，港股調整持續，而周五更失守20800短線支持，預期本周考驗50日線及250日線機會大增。留意本周後期將踏入期指轉倉高峰期，港股或變得反覆，一旦恒指能收復10日線並企穩，本月嘅淡倉亦應先行撤退，待期指結算再作定奪。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。