中美高層對話好淡消息皆空
3月19日，多雲，早上有一兩陣微雨，日間短暫時間有陽光，乍暖還寒。聯儲局議息結果塵埃落定，市場已預期債息趨升持續高企，但古天后已強調，市場即使接受一個較高水平嘅美國長債息，但債息嘅速度唔可以急促，一定要循序漸進，否則股市尤其係估值較高嘅成長股，將會持續受到衝擊。話口未完，隔晚美股又見科技股災，納指跌3%或409點，標指跌1.4%或58點，雖然道指有銀行股支撐，但喺早段創盤中新高後，仍被拖累跌153點。
大大小小嘅科技股再見沽壓，蘋果跟英特爾均跌逾3%，微軟亦跌2.6%。不過美國債息上漲利好息差，刺激金融股做好，摩根大通及高盛等逆市上升。雖然美國10年期債息高企於1.7厘水平之上，盤中更一度升至1.757厘，目前於1.717厘水平高位徘徊，但事實上債息跟科技股關係已開始一步步減退，主要係大部份科技股由2月中高位回落，經過呢一個月時間調整，唔少都較高位回落逾三成，大部份股份已成功尋底，開始喺底部整固，間中反彈，形成上落市格局。而恒指喺資金於新舊經濟股之間輪動下，同樣於區間移動，上上落落，形成炒股唔炒市嘅情況。留意恒科指只要企穩喺8400點水平問題不大，跌穿8000點則再有一輪深度調整，守住8400點恒科指反彈仍有機會反彈至9000甚至9300點水平。
聯儲局議息會議後，市場焦點將轉移至中美高層戰略對話，雙方關係改善與否，將直接影響全球經濟復甦速度。雖然市場預計拜登政府將一改特朗普政府對華份外強硬嘅作風，但自拜登上場以來，一直未有確切評論對華政府，期間未有進行任何舉措扭轉前朝對個別華資企業嘅制裁行動，中美關係目前仍在估估吓嘅階段，今次雙方高層對話，能否為中美關係帶嚟任何突破，市場仍拭目以待。
事實上，中美喺基本理念上南轅北轍，特別喺地區安全問題上，兩個矛盾更益發加深，尤其南海問題，一直維持喺緊張狀態，估計雙方喺呢方面唔會有乜嘢共識，亦唔會作任何妥協，繼續喺一個拉鋸狀態。反而市場正觀望中美雙方能否係經濟層面上，減少過去幾年嘅金融及科技戰，共同為全球經濟復甦努力。而全球經濟喺復甦上面對多種壓力，喺外部政治取態上應難如過往疫情未發生時強硬，等經濟重回正軌再作相議。預期喺呢個背景下，中美今年之間應該唔會有太壞嘅狀況發生，今次中美高層對話，頂多係無乜好消息，而應該唔會出現太大壞消息。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。